![‘प्यालेस्टाइनीले गाजा छाड्न थाले’ (तस्बिरहरू)](https://12khari.top/uploads/posts/g3-1697289443.jpg)
तेल अभिभ । इजरायली प्रतिरक्षा फौज (आईडीएफ)का प्रवक्ता लेफ्टिनेन्ट कर्णेल जोनाथन कनरिकसले गाजापट्टीका नागरिकले आफ्नो सेनाको चेतावनी सुनिरहेको र सही काम गरिरहेको बताएका छन् । उनका अनुसार प्यालेस्टाइनी नागरिक उल्लेखनीय रूपमा दक्षिणतिर जान थालेका छन् ।
“हामीले प्यालेस्टाइनी नागरिक उल्लेखनीय रूमा दक्षिणतिर जान सुरु गरेको देखेका छौँ, हाम्रो चेतावनीलाई सर्वसाधारणले सुनिरहेको देखेका छौँ । उनीहरूले चलाखीपूर्वक काम गरिरहेका छन्, खतरनाक क्षेत्रबाट बाहिर निस्किरहेका छन् र उनीहरूको परिवारका लागि यो सही हो भन्ने बुझेका छन्,” उनले भने ।
शुक्रबार इजरायली सेनाले गाजा सहरबाट बाहिर निस्कन सर्वसाधारणलाई आह्वान गरेको थियो । आईडीएफले युद्धमा सर्वसाधारण प्रभावित नहोऊन् भन्ने चाहना व्यक्त गरेको थियो । आईडीएफले हमास र उसका सैन्य पूर्वाधारमा हमला गर्न गइरहेको जनाएको थियो ।
“हामीले हाम्रो मनसाय पहिले नै बतायौँ, किनकि यसमा कुनै सैन्य तर्क थिएन । तर, यद्धबाट सर्वसाधारण प्रभावित हुनु नपरोस् भन्ने हामी चाहन्छौँ,” उनले भने, “हामीले युद्धमा सर्वसाधारणलाई त्यहाँ समावेश गरेका छैनौँ र तिनीहरू हाम्रा शत्रु होइनन् । हामी कुनै पनि सर्वसाधारणलाई मार्ने वा घाइते बनाउने प्रयास गरिरहेका छैनौँ । हामी हमास र उसका सैन्य पूर्वाधारसँग लडिरहेका छौँ, जहाँ हामीले गाजापट्टी र गाजापट्टीका उत्तरी भागलाई लक्षित गरेका थियौँ ।”
लेफ्टिनेन्ट कर्णेल कनरिकसले उत्तरी गाजाबाट प्यालेस्टाइनीलाई बाहिर जानबाट रोक्न हमासले प्रयास गरिरहेको बताए । “अन्तर्राष्ट्रिय सञ्चारमाध्यमका अनुसार सन्देश र चेकपोइन्टका माध्यमबाट हमासले प्यालेस्टाइनी नागरिकलाई उक्त क्षेत्र खाली गर्नबाट रोक्ने प्रयास गरिरहेको छ । मलाई लाग्छ, यो शंकास्पद छ ।”
आफ्नै सुरक्षाका लागि प्यालेस्टाइनीले चाँडोभन्दा चाँडो उक्त क्षेत्र खाली गर्ने उनले आशा व्यक्त गरे । रासस/एएनआई