काठमाडौं । नेपालका लागि अमेरिकी राजदूत डीन आर थम्पसनले प्यालेस्टाइनी चरमपन्थी समूह हमासको आक्रमणमा परी १० नेपाली विद्यार्थीको मृत्यु भएको घटनाप्रति दुःख व्यक्त गरेका छन् ।

“इजरायलमा आतंकवादी संगठन हमासले गरेको आक्रमणको खबर सुनेर म अत्यन्तै दुखी छु,” राजदूत थम्पसनले सामाजिक सञ्जाल एक्समा लेखेका छन्, “यस निर्मम आक्रमणमा ज्यान गुमाएका नेपालीहरूका परिवारजनमा गहिरो समवेदना प्रकट गर्दछु ।”

आफ्नो साथ नेपाली जनतासँग रहेको उनले जनाएका छन् । उनले इजरायलमा बसोबास गर्ने सबै नेपालीको सुरक्षाको कामना गरेका छन् ।

गएको शनिबार हमासले इजरायलमा आक्रमण गर्दा १० नेपाली विद्यार्थीको मृत्यु भएको थियो ।