काठमाडौं । प्रधानमन्त्री पुष्पकमल दाहाल ‘प्रचण्ड’ले स्वास्थ्य क्षेत्रमा हुने अवाञ्छित गतिविधि नियन्त्रण गर्न सरकार दृढ रहेको बताएका छन् । बिहीबार काठमाडौंमा आयोजित एक कार्यक्रममा उनले यस्तो बताएका हुन् ।

उनले स्वास्थ्यकर्मीलाई पूर्ण भरोसा र आत्मविश्वासका साथ बिरामीको उपचारमा सक्रिय रहन आग्रह समेत गरे । वीर अस्पताललाई अझै विस्तार र सुविधासम्पन्न बनाउन सरकारले थप लगानी गर्ने उनले प्रतिबद्धता जनाए ।

नर्सिङ सेवाका समस्या समाधान गर्नेतिर सरकार दृढतापूर्वक अघि बढेको उनले उल्लेख गरे । संविधानमा व्यवस्था गरिएबमोजिम मौलिक हकको कार्यान्वयनका निम्ति आवश्यक कानुन निर्माण, संरचनाको विकास र सेवा प्रवाहका क्षेत्रमा अझै थुप्रै काम गर्न बाँकी रहेको प्रधानमन्त्री प्रचण्डले बताए ।

उनले संविधानप्रदत्त स्वास्थ्यसम्बन्धी हकको कार्यान्वयनका निम्ति चिकित्सा विज्ञान राष्ट्रिय प्रतिष्ठानजस्ता सरकारी संरचनाको भूमिका सबैभन्दा महत्त्वपूर्ण हुनेमा जोड दिए ।

“जनतको उपचारमा कार्यरत चिकित्सकको पेसागत सुरक्षा, हित र वृद्धि विकासमा सरकार सचेत र गम्भीर छ । पछिल्लो समय बिरामीहरूको उपचारमा क्रियाशील स्वास्थ्यकर्मीमाथि भइरहेका आक्रमणलाई सरकारले र सरकार प्रमुखको हैसियतले मैले गम्भीर रूपमा लिएको छु । यसबारेमा सरकारले स्वास्थ्यकर्मीहरूसँग संवाद गरी आवश्यक कानुनी प्रबन्ध गर्ने सहमति र सोअनुसारको गृहकार्य गरिसकेको छ,” उनले भने, “स्वास्थ्यजस्तो अति संवेदनशील क्षेत्रमा हुने कुनै पनि प्रकारका अवाञ्छित गतिविधि नियन्त्रण गर्न सरकार दृढ रहेको छ । स्वास्थ्यकर्मीहरूलाई पूर्ण भरोसा र आत्मविश्वासका साथ बिरामीको उपचारमा सक्रिय रहन अपिल गर्दछु ।”

प्रधानमन्त्री प्रचण्डले हरेक लोकतान्त्रिक देश र प्रणालीमा राज्य नागरिकको वास्तविक अभिभावक र संरक्षक रहेको बताए । गरिब, विपन्न, असहाय एवं उपेक्षित वर्ग, जाति, क्षेत्र, लिंग र समुदायको अधिकार र अवसरका निम्ति राज्यको जिम्मेवारीमा रहेका सबैले कुशलतापूर्वक आफ्नो भूमिका पूरा गर्नुपर्ने उनले उल्लेख गरे ।