काठमाडौं । एसिया कप–२०२३ मा मंगलबार भारतसँग श्रीलंका ४१ रनले हार्‍यो । तर, श्रीलंकन युवा दुनिथ वेललागे हारेनन् । प्रतियोगिताको ‘सुपर फोर’मा भारतको यो लगातार दोस्रो जित थियो । श्रीलंकाको पहिलो हार ।

श्रीलंकन युवा स्पीनरले जादुमय प्रदर्शन गर्दै भारतका पाँच विकेट लिए । जसमा भारतीय कप्तान रोहित शर्मा र विराट कोहलीजस्ता क्रिकेटका ‘बादशाह’ समावेश थिए ।

श्रीलंकाले हारे पनि अलराउन्डर प्रदर्शन गरेका दुनिथ नै प्रतियोगिताको ‘प्लेयर अफ दी म्याच’ चुनिए । पाँच महत्त्वपूर्ण विकेट लिएर उनले भारतीय समर्थकको खुसियाली खोसे । भारतीय बलरसामु श्रीलंकन ब्याटर निरीह देखिए । ४२ रन बनाएर दुनिथ नै टिमबाट सबैभन्दा धेरै रन बनाउने खेलाडी बने ।

भारत टस जितेर ब्याटिङमा उत्रिएको थियो । आर प्रेमादसा रंगशालामा कप्तान रोहित शर्मा र शुभमन गिलले ओपनिङमा राम्रो सुरुआत दिलाउँदा भारतीय समर्थकमाझ ३५० माथिको योगफल रहने अनुमान थियो । तर, दुनिथले रोहित, शुभमन, विराट कोहली, हार्दिक पन्ड्या र केएल राहुललाई आफ्नो सिकार बनाएपछि भारतको ब्याटिङ धराशायी बन्यो । टिम २१३ रनमै समेटियो ।

दुनिथले सुपर फोरमा पाकिस्तानविरुद्धको खेलमा पनि आफ्नो प्रतिभालाई कायम राखे । उनले पाकिस्तानका कप्तान बाबर आजमलाई पभेलियनको बाटो देखाएका थिए । स्टिभ स्मिथ, ग्लेन म्याक्सवेल, डेविड वार्नर, रोहित, विराट र बाबर २० वर्षीय दुनिथसामु निरीह बनेका चर्चित नाम हुन् ।

को हुन् दुनिथ ?
दुनिथ वेलालागे एक श्रीलंकन नाम जो अन्तर्राष्ट्रिय क्रिकेट क्षेत्रमा द्रुत रूपमा उक्लँदै छ । जसले श्रीलंकन क्रिकेट भविष्यको प्रतिज्ञा र क्षमताको प्रतिनिधित्व गर्छ । सन् २००३ जनवरी ३ मा दुनिथको जन्म श्रीलंकाको ‘मुटु’ कोलम्बोमा भएको थियो । २० वर्षमै पाएको चर्चाले क्रिकेटप्रति उनको लगाव र महत्त्वाकांक्षालाई स्पष्ट देखाउँछ ।

मोरातुवाको सेन्ट सेबास्टियन कलेज र कोलम्बोको सेन्ट जोसेफ कलेजजस्ता प्रख्यात शैक्षिक संस्थाहरूको उत्पादन भएकाले दुनिथले सानै उमेरदेखि आफ्नो क्रिकेट कौशललाई सम्मान गर्ने वातावरण प्राप्त गरे ।

उनले बायाँ हात अर्थाेडक्स शैली प्रयोग गर्दै बलरका रूपमा विशेषज्ञता हासिल गरेर घरेलु क्रिकेटको परिवेशमा आफ्नो छाप छोडे । विशेष गरी ‘पावर प्ले’पछि बलिङ गर्ने क्षमताले खेलमा उनको बहुमुखी प्रतिभा र अनुकूलता देखाउँछ ।

दुनिथको ‘डेब्यु’
दुनिथको क्रिकेट यात्रामा सन् २०१९ महत्त्वपूर्ण रह्यो । त्यस वर्ष उनले लंकन क्रिकेट क्लबबाट श्रीलंकाको घरेलु क्रिकेटमा पाइला चाले । र, सोही वर्ष फर्स्ट क्लास क्रिकेटमा ‘डेब्यु’ समेत गरे ।

२०१९ मे ९ मा वेलिसारामा एसएल नौसेनाविरुद्ध श्रीलंका सीसीका लागि खेल्नु उनको उदीयमान कौशल र चयनकर्ताले देखेको सम्भावनाको प्रमाण थियो । सोही वर्ष उनले ट्वान्टी–२० ढाँचामा डेब्यु गर्ने मौका पाए ।

त्यसपछि दुनिथले तीनै ढाँचाका घरेलु क्रिकेटमा आफ्नो स्थान सुदृढ पार्दै लगे । श्रीलंका क्रिकेट बोर्डले २०२२ मा उनलाई राष्ट्रिय टोलीमा समावेश गर्यो । यो दुनिथको क्षमतामा बोर्डले देखाएको विश्वास र समर्थन थियो । सँगै राष्ट्रिय टिमबाट खेल्ने उनको सपनाका लागि महत्त्वपूर्ण अवसर पनि ।

उनले २०२२ जुन १४ मा अस्ट्रेलियाविरुद्ध एकदिवसीय अन्तर्राष्ट्रिय क्रिकेटमा डेब्यु गरे । सोही वर्ष जुलाई २४ मा दुनिथले पाकिस्तानविरुद्ध टेस्ट क्रिकेटमा डेब्यु गरे । श्रीलंकाबाट उनले अहिलेसम्म खेलेको त्यो एक मात्र टेस्ट क्रिकेट हो । श्रीलंकाबाट १४ एकदिवसीय अन्तर्राष्ट्रिय क्रिकेट खेलेका दुनिथले १९ विकेट लिएका छन् ।

लंका प्रिमियर लिगमा दुनिथ
२०२२ मै दुनिथ फ्रेन्चाइजी क्रिकेटमा प्रवेश गरे । उनले श्रीलंका प्रिमियर लिगमा आफ्नो प्रतिभा देखाउने मौका पाए । २०२२ को लंका प्रिमियर लिगका लागि जाफ्ना किंग्सले उनलाई किनेको थियो ।

किशोरावस्थामै जाफ्ना किंग्सको एक हिस्सा बनेको तथ्यले नै दुनिथमा रहेको प्रतिभा र क्षमतालाई दर्साउँछ । दुनिथ श्रीलंका क्रिकेट टोलीका लागि आशाको किरण मात्र होइन, उदीयमान क्रिकेटरका निम्ति प्रेरणाको स्रोत पनि बनेका छन् ।