विराटनगर । एनपीएल लिग खेल्ने विराटनगर किंग्सको जर्सी र गीत सार्वजनिक गरिएको छ । मंगलबार साँझ कोसीका मुख्यमन्त्री हिक्मत कार्कीले विराटनगरमा एक कार्यक्रमबीच जर्सी सार्वजनिक गरे ।

जर्सीको कलर पहेँलो र निलो रहेको छ । जर्सीसँगै कार्यक्रममा टिमको एन्थम गीत समेत सार्वजनिक गरिएको छ । 

भ्वाइस अफ विराटनगर किंग्स तथा एम्बासिडर समेत रहेका कुशल पोखरेलले उक्त रचना तयार पारेका हुन् । विराटनगर किंग्सको गीत र्‍याप फर्म्याटमा रहेको छ । 

यसका साथै विराटनगर किंग्सको फेसमा गायिका रचना रिमाललाई घोषणा गरिएको छ । पूर्वेली गायिका रिमाल क्रिकेटको ठूलो समर्थक हुन् ।

कार्यक्रममा भर्खरै नेपाली अन्डर १९ महिला क्रिकेट टिमलाई विश्वकप यात्रा दिलाउन सफल कोच महेशप्रसाद रिजाल र खेलाडी रिया शर्मालाई समेत सम्मानित गरिएको थियो । 

कार्यक्रममा टिमका मार्की खेलाडी सन्दीप लामिछाने सहभागी थिए । कार्यक्रममा कोसी प्रदेशका ५ जिल्लामा रहेका क्रिकेट संघहरुलाई क्रिकेट किटसमेत प्रदान गरिएको थियो । 

ग्रासरुटका खेलाडीको क्रिकेट विकासका लागि उक्त किट हस्तान्तरण गरिएको टिमका मालिक पारस लुनियाले बताए ।