काठमाडौं । कम्पनी रजिस्ट्रारको कार्यालयले सफ्टवेयर फेर्ने तयारी गरेको छ । नयाँ सफ्टवेयर आगामी असोज १५ गते सार्वजनिक गर्ने गरी तयारी भइरहेको कार्यालयका उपरजिस्ट्रार तथा सूचना अधिकारी शेखरबाबु कार्कीले जानकारी दिए ।

उनका अनुसार कम्पनी दर्ता तथा प्रशासनसम्बन्धी सेवालाई छिटो, छरितो, विश्वसनीय र प्रविधिमैत्री बनाउन नयाँ सफ्टवेयर सञ्चालन गर्न लागिएको हो ।

सरकारले चालु आर्थिक वर्षको बजेट वक्तव्यमार्फत ‘आन्तरिक तथा बाह्य लगानी प्रवर्धन’का लागि कम्पनी दर्ता सुधार गर्ने बताएको थियो ।

बजेटको ७० नम्बर बुँदामा भनिएको छ, “अनलाइनबाट नै कम्पनी दर्ता र खारेजी गर्न सकिने गरी प्रक्रियालाई सरल र पारदर्शी बनाइने छ ।”

सरकारले बजेटमार्फत घोषणा गरेको नीति कार्यान्वयन गर्न तथा कम्पनी रजिस्ट्रारलाई प्रविधिमैत्री बनाउन नयाँ सफ्टवेयर प्रयोगमा ल्याउन लागिएको कार्यालयले जनाएको छ । नयाँ सफ्टवेयर सञ्चालनमा आएसँगै कार्यालयले दिँदै आएको सेवामा गुणात्मक सुधार अपेक्षा गरिएको छ । 

“हामीले असोज १५ मा नयाँ सफ्टवेयर सार्वजनिक गर्दै छौँ । त्यसैको तयारीमा छौँ । सबै काम अन्तिम चरणमा पुगेको छ,” कार्कीले बाह्रखरीसँग भने ।

कम्पनी दर्ता अनलाइनबाटै

नयाँ सफ्टवेयर सञ्चालनमा आएसँगै अनलाइनबाटै कम्पनी दर्ता गर्न सकिने छ । अनलाइनबाटै कम्पनी दर्ता गर्दा कार्यालयमा हुने भिड हट्ने अपेक्षा गरिएको छ । 

यद्यपि, अनलाइनबाट सेवा लिने वा भौतिकरूपमा कागजात पेस गरेर सेवा लिने भनेर विकल्प पनि दिइने छ । अर्थात्, भौतिकरूपमा कागजात पेस गरेर पनि कम्पनी दर्ता गर्न सकिने छ ।