काठमाडौं । कीर्तिपुर भेट्रान्स फोर्टीप्लस ओपन फुटसल प्रतियोगिताको उपाधि फ्रिडम फाइटर्स ‘बी’ ले जितेको छ । 

शनिबार भएको फाइनलमा फ्रिडम फाइटर्स ‘ए’ लाई २–१ ले हराउँदै फ्रिडम फाइटर्स ‘बी’ प्रतियोगिताको च्याम्पियन बनेको हो ।

कीर्तिपुर भेट्रान्स क्लबले आयोजना गरेको प्रतियोगितामा ३० टीमको सहभागिता थियो । कीर्तिपुरस्थित एसएस कृनगर फुटसलमा प्रतियोगिता शुक्रबार र शनिबार गरी दुई दिन सञ्चालन भएको थियो । 

प्रतियोगितामा पहिलो हुने टिम फ्रिडम फाइटर्स ‘बी’ का खेलाडी र पदाधिकारीलाई वाग्मती प्रदेश सरकारका संस्कृति, पर्यटन तथा सहकारीमन्त्री पुकार महर्जनले प्रमाणपत्र, मेडल र ट्रफी प्रदान गरेका थिए । 

फ्रिडम फाइटर्स ‘बी’ ले उपाधिसँगै ५० हजार र उपविजेता फ्रिडम फाइटर्स ‘ए’ ले २५ हजार रुपैयाँ, प्रमाणपत्र, मेडल र ट्रफी पाए ।

प्रतियोगितामा फ्रिडम फाइटर्स ‘बी’ का कमल विष्ट उच्च गोलकर्ता, फ्रिडम फाइटर्स ‘ए’ का राजकुमार घिसिङ उत्कृष्ट खेलाडी र बाखत फुटसलका धनबहादुर पुन उत्कृष्ट गोलकिपर घोषित भए । उत्कृष्ट खेलाडी, उच्च गोलकर्ता र उत्कृष्ट गोलकिपरले समान दुई हजार ५०० रुपैयाँ पुरस्कार पाए ।

पुरस्कार वितरण समारोहमा बोल्दै वाग्मती प्रदेश सरकारका संस्कृति, पर्यटन तथा सहकारीमन्त्री पुकार महर्जनले यस्ता खेलकुद कार्यक्रमलाई निरन्तरता दिन आग्रह गरेका थिए । उनले खेलकुदलाई प्रदेश सरकारले सहयोग गर्ने प्रतिवद्धतासमेत जनाए ।