काठमाडौं । एसिया कपमा भारतविरुद्धको ब्याटिङमा राम्रो प्रदर्शन गर्ने नेपाली खेलाडीहरूले अर्ना बियरबाट साढे आठ लाख रुपैयाँ पाउने भएका छन् ।

यती ब्रेवेरीको उत्पादन अर्ना बियरले एसिया कप–२०२३ अन्तर्गत भारतविरुद्धको खेलमा नेपाली ब्याटरले प्रहार गर्ने प्रत्येक छक्का र बलरले लिने प्रत्येक विकेटबापत एक–एक लाख रुपैयाँ दिने घोषणा गरेको थियो । यस्तै, अर्नाले प्रत्येक चौकामा २५ हजार रुपैयाँ प्रदान गर्ने बताएको थियो ।

घोषणाबमोजिम ब्याटिङमा पाँजना खेलाडीले आठ लाख ५० हजार रुपैयाँ पाउने अर्नाले जनाएको छ । जसअनुसार कुशल भुर्तेलले दुई लाख ७५ हजार रुपैयाँ पाउने छन् । आसिफ शेखले दुई लाख, गुल्शन झाले ७५ हजार, दीपेन्द्रसिंह ऐरीले ७५ हजार र सोमपाल कामीले दुई लाख २५ हजार रुपैयाँ पाउने भएका हुन् । 

सोमबार टस हारेर सुरुमा ब्याटिङ गरेको नेपालले ४८.२ ओभरमा सबै विकेट गुमाएर २३० रन बनाएको छ । जवाफी ब्याटिङमा उत्रिएको भारतले २.१ बलमा १७ रन बनाएको छ । तर, त्यसपछि वर्षाका कारण रोकिएको खेल अझै सुरु भएको छैन ।