काठमाडौं । तीन खेलको ट्वान्टी–२० शृंखलाका लागि युनाइटेड अरब इमिरेट्स (यूएई) भ्रमणमा रहेको टेस्ट राष्ट्र न्युजिल्यान्डले दोस्रो खेलमा घरेलु टिमसँग सात विकेटको हार बेहोरेको छ । शनिबार राति दुबई अन्तर्राष्ट्रिय क्रिकेट रंगशालामा सम्पन्न खेलमा न्युजिल्यान्डले प्रस्तुत गरेको १४३ रनको लक्ष्य यूएईले १५.४ ओभरमा तीन विकेट गुमाएर भेट्टायो ।

यूएईको जितमा कप्तान मुहम्मद वसिमले ५५ रन बनाए । वसिमले २९ बलमा चार चौका र तीन छक्का प्रहार गरे । आसिफ खानले अविजित ४८ रन थपे । उनले २९ बलमा पाँच चौका र एक छक्का प्रहार गरे । भ्रित्या अरविन्दले २५, र बसिल हमेदले १२ रन बनाए ।

न्युजिल्यान्डका टिम साउदी, मिचेल स्यान्टनर र काइल जेमिसनले समान एक विकेट लिए ।

त्यसअघि, टस हारेपछि ब्याटिङमा आएको न्युजिल्यान्डले निर्धारित २० ओभरमा आठ विकेट गुमाएर १४२ रनको योगफल खडा गरेको थियो ।

न्युजिल्यान्डका मार्क क्याम्पमानले ६३ रन बनाएका थिए । चाड बोवेस र जिमी निसमले समान २१ थप्नुबाहेक अन्यले दोहोरो अंकमा रन जोड्न सकेनन् ।

न्युजिल्यान्डलाई सस्तैमा समेट्न यूएईका आयान अफ्जल खानले तीन विकेट लिए । मुहम्मद जवादुल्लाहले दुई विकेट लिँदा अली नासिर, जहुर खान र मुहम्मद फराजुदिनले समान एक विकेट लिए ।

यो जितसँगै यूएईले तीन खेलको शृंखला १–१ को बराबरीमा ल्याएको छ । यूएई यसअघि पहिलो खेलमा भने १९ रनले पराजित भएको थियो । यी दुई टिमबीचको अन्तिम तथा निर्णायक खेल आज बेलुका ७ः४५ बजेदेखि सुरु हुँदै छ ।