काठमाडौं । विदेशबाट फर्कने नेपाली यात्रीले तोकिएको मात्रामा सुनका गहना, मोबाइल र टीभी सेट ल्याउँदा यहाँ भन्सार शुल्क तिर्नु पर्दैन । त्यस विषयमा विभिन्न व्यवस्था गरिएको त्रिभुवन विमानस्थल भन्सार कार्यालयले जनाएको छ ।

तोकिएभन्दा बढी मात्रामा त्यस्ता सामग्री ल्याउँदा नियमानुसार शुल्क तिर्नुपर्छ । भन्सार कार्यालयका अनुसार महिलाको हकमा ५० ग्रामसम्मको सुनको गहनामा भन्सार शुल्क तिर्नु पर्दैन । पुरुषको हकमा २५ ग्रामसम्मको सुनको गहनामा भन्सार तिर्नु पर्दैन ।

यस्तै, एक व्यक्तिले (महसुल तिर्नु नपर्ने : महिलाको हकमा ५० ग्राम र पुरुषको हकमा २५ ग्रामबाहेक) थप २०० ग्रामसम्म सुनको गहना भन्सार विन्दुमा महसुल तिरेर साथमा ल्याउन पाइन्छ ।

गहनाको आकार मात्र दिएर बनाइएका बेरुवा औँठी, बाला, सिक्रीजस्ता रसायन प्रयोग नगरिएका सुनलाई गहनाको मान्यता नहुने सो कार्यालयले जनाएको छ ।

कार्यालयका अनुसार विदेशबाट फर्कने नेपालीले आफूले प्रयोग गरिरहेको मोबाइल साथमा ल्याउँदा भन्सार शुल्क तिर्नु पर्दैन ।

यस्तै, श्रम स्वीकृति लिएर लगातार ६ महिनाभन्दा बढी विदेशमा काम गरी फर्किएका यात्रीले आफ्नो साथमा थप एकथान मोबाइल भन्सार शुल्क नतिरी ल्याउन पाउँछन् । यस्तो मोबाइलका लागि भन्सार कार्यालयमा घोषणा गरी प्रक्रिया भने पूरा गर्नुपर्ने जनाइएको छ ।

श्रम स्वीकृति लिई लगातार १२ महिना काम गरी फर्कने सामाजिक सुरक्षा कोषमा सूचीकृत नेपाली यात्रीले जुनसुकै आकारप्रकारको टेलिभिजन साथमा ल्याउँदा पनि भन्सार शुल्क तिर्नु पर्दैन ।

श्रम स्वीकृति लिई लगातार १२ महिना काम गरी फर्किएको भए पनि सामाजिक सुरक्षा कोषमा सूचीकृत नभएका नेपालीले ३२ इन्चसम्मको टेलिभिजन मात्र भन्सार नतिरी साथमा ल्याउन पाउँछन् ।

यसबाहेक अरू अवस्थामा सबै टेलिभिजनको नियमानुसार भन्सार शुल्क तिर्नुपर्ने कार्यालयले जनाएको छ ।