काठमाडौं । यसै महिना अगस्टमा ५० लाख गाडी उत्पादनको आँकडा पार गरेको चिनियाँ अटोमेकर बीवाईडीका विद्युतीय गाडीले विश्वभर आक्रामक तरिकाले बजार विस्तार गर्न थालेको छ । बीवाईडीले अहिले ५४ भन्दा बढी देशमा आफ्ना गाडी गुडिरहेको बताएको छ ।

विश्वका प्रमुख विद्युतीय सवारी (ईभी) निर्माताको सूचीमा प्रवेश गरेको बीवाईडीका विद्युतीय गाडीले नेपालमा पनि महत्वपूर्ण स्थान बनाएका छन् । हाल नेपालमा बीवाईडीका ‘अट्टो थ्रि’ र ‘अल न्यू ई६’ दुई मोडेलका गाडी उपलब्ध छन् ।

बीवाईडीको अट्टो थ्रि मोडेलका विद्युतीय गाडी किफायती मूल्य, उच्च पर्फमेन्स र अत्याधुनिक फिचरका कारण ग्राहकको प्रमुख रोजाइमा परेका छन् । अहिले अट्टो थ्रि मोडेल ‘सुपेरियर’, ‘पर्फमेन्स’ र ‘एडभान्स्ड’ गरी तीन भेरियन्टमा उपलब्ध रहेको नेपालका लागि बीवाईडीको आधिकारीक बितरक साइमेक्स इन्कले जनाएको छ । 

अट्टो थ्रिका यी भेरियन्ट विशेष ‘फरेस्ट ग्रिन’ कलर एडिसनमा पनि पाउन सकिने कम्पनीले जनाएको छ । यस्तै ‘अल न्यू ई६’ मोडेलको गाडी पनि नेपालमा उपलब्ध रहेको छ । यी सबै गाडीहरु एक पछि अर्काे ग्राहकको रोजाइमा परेको साइमेक्स इन्ककी प्रबन्ध निर्देशक यमुना श्रेष्ठले बताएकी छन् । पछिल्लो समय चीनबाट मागअनुसार निरन्तर गाडी भित्रिइरहेको उनले बताइन् ।

बीवाईडीले केही दिनअघि मात्रै फर्च्युन ग्लोबलको राजस्वका आधारमा संसारका सबैभन्दा ठूला ५०० कम्पनीमा २१२ औँ स्थान बनाएको छ । बीवाईडीको बजार विस्तारले अमेरिकी अटो निर्माता टेस्लालाई नै पनि खासगरी घरेलु बजारमा चूनौती दिन थालेको छ ।

नेपालमा बीवाईडीको कुन भेरियन्ट कस्तो ?

अट्टो थ्रि मोडलका तीनवटै भेरियन्टमा पाँच सिट क्षमता छ । सबै भेरियन्ट ग्राहकले चाहेमा फरेस्ट ग्रिन कलरमा पनि उपलब्ध हुने कम्पनीले जनाएको छ ।

अट्टो थ्रि : एडभान्स्ड 
यो अट्टो थ्रि मोडेलको सुरुवाती अथवा बेस भेरियन्ट हो । ४९.९२ किलोवाट आवरको ब्याट्री रहेको एडभान्स्डले ३४५ किलोवाट रेन्ज दिने कम्पनीको दाबी छ ।

एक सय र १५० किलोवाट मोटर पावरमा उपलब्ध यसमा कलर ग्रेडियन्ट भने एउटा मात्रै छ । ७० किलोवाटको चार्जरले ४५ मिनटेमा चार्ज हुने यो गाडीको मूल्य भने ५५ लाख ९९ हजार रुपैयाँ रहेको छ ।

अट्टो थ्रि : सुपेरियर 

गाडी मूल्य र थप फिचरका कारण महत्वपूर्ण देखिन्छ । ६०.४८ किलोवाटआवरको ब्याट्री रहेको सुपेरियरमा १०० किलोवाट मोटर पावर छ । एक पटक फुल चार्ज गर्दा ४२० किलोमिटर रेन्ज दिने सुपेरियरलाई ८० किलो वाटको र्चाजरले ४५ मिनेटमा फुल गर्न सकिने कम्पनीको भनाइ छ । 

एडभान्स्ड भन्दा फरक यो भेरियन्टमा मल्टि कलर ग्रेडियन्ट रहेको छ भने, वान–टच टेलगेट पनि उपलब्ध छ । बढ्दो वायु प्रदुषणबाट बचाउन यो गाडीमा पीएम २ं५ एयर फिल्टरसमेत रहेको छ ।
अट्टो थ्रि सुपेरियरको मूल्य ६५ लाख ८८ हजार रहेको छ ।

अट्टो थ्रि : पर्फमेन्स

बीवाईडीको अट्टो थ्रि पर्फमेन्समा ६०.४८ किलोवाटआवरकै ब्याट्री रहेको छ । यसको मोटरपावर भने १५० किलोवाट छ । एक पटक फुल चार्ज गर्दा यसले ४२० किलोमिटर रेन्ज दिने कम्पनीले जनाएको छ । 

८० किलोवाटको चार्जरले गाडी ४५ मिनेटमा चार्ज गर्न सकिने कम्पनीले बताएको छ । अट्टो थ्रि पर्फमेन्सको मूल्य ८१ लाख ९९ हजार रहेको छ ।

अल–न्यू ई६ मोडेल 

अल–न्यू ई६ मोडेलको गाडीको मूल्य ५९ लाख रुपैयाँ रहेको छ । ७१.५ किलोवाटआवरको ब्याट्री रहेको यो गाडीमा मोटर पावर ७० किलोवाट रहेको छ ।  एक पटक फूल चार्ज गर्दा ५२२ किलोमिटर रेन्ज दिने गाडीलाई ३० मिनेटमा ८० प्रतिशत चार्ज गर्न सकिने कम्पनीले जनाएको छ ।

अट्टो थ्रि मोडेल झैं यसमा पनि पाँच सिट क्षमता रहेको छ ।