काठमाडौं । अपि पावर कम्पनीले आउँदो साउन ३१ गतेदेखि हकप्रद सेयर निष्कासन गर्ने भएको छ । उक्त हकप्रद सेयरमा कम्पनीका सेयरधनीले भदौ १९ गतेसम्म आवेदन दिन सक्नेछन् ।

कम्पनीले प्रतिकित्ता अंकित मूल्य १०० रुपैयाँमा एक करोड ६५ लाख ३३ हजार १३७ कित्ता हकप्रद सेयर निष्कासन गर्न लागेको हो । असार २१ गतेसम्म नेपाल स्टक एक्सचेन्जमा कारोबार भई कायम सेयरधनीले कम्पनीको हकप्रदमा आवेदन दिन सक्नेछन् ।

कम्पनीले हाल कायम रहेको चुक्तापुँजीको ४० प्रतिशत हकप्रद सेयर निष्कास गर्न लागेको हो । हाल कम्पनीको चुक्तापुँजी चार अर्ब १३ करोड ३२ लाख ८४ हजार २१२ रुपैयाँ रहेको छ ।

कम्पनीको हकप्रद बिक्री प्रबन्धकमा मुक्तिनाथ क्यापिटल लिमिटेड रहेको छ । लगानीकर्ताले अपि पावर, मुक्तिनाथ क्यापिटल र मुक्तिनाथ विकास बैंकका तोकिएका शाखा कार्यालयहरूबाट आवेदन दिन सक्नेछन् । 

यसका साथै नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाहरूबाट सि–आस्वा प्रणालीमार्फत र सीडीएस एण्ड क्लियरिङ लिमिटेडबाट निर्माण गरिएको सफ्टवेयर मेरो सेयर अनलाइन प्रयोग गरी आवेदन दिन सक्नेछन् ।