काठमाडौं । काठमाडौं उपत्यकाको फोहोर आज निर्बाध रूपमा विसर्जन गरिएको छ । नुवाकोट र धादिङको सिमानामा पर्ने बन्चरेडाँडास्थित ल्यान्डफिल साइटमा फोहोर विसर्जनमा कुनै अवरोध नभएको काठमाडौं महानगरपालिकाले जनाएको छ ।

स्थानीयको अवरोधका कारण यसअघि चार दिनसम्म फोहोर विसर्जन कार्य रोकिएको थियो । हिजोदेखि पुनः नियमित रूपमा फोहोर विसर्जन गर्न थालिएको महानगरको वातावरण विभागका प्रमुख रविनमान श्रेष्ठले जानकारी दिए ।

हिजो १५२ गाडी फोहोर विसर्जन गरिएको उनले बताए । आज त्यो संख्या २०० को हाराहारीमा पुग्ने उनको भनाइ छ ।

“आज कुनै अवरोध छैन । फोहोर फाल्ने कार्य सामान्य छ,” उनले बाह्रखरीसित भने, “प्रहरीको सहायता पनि लिनुपरेको छैन ।”

शुक्रबार काठमाडौंबाट फोहोर लिएर गएका गाडीलाई केही स्थानीयले अवरोध गरेका थिए । प्रहरीले बल प्रयोग गरी बाटो खुलाएको थियो ।

फोहोरको दुर्गन्धले बस्नै गाह्रो भएको, धेरै झिँगा भन्किएको र संघ सरकार र काठमाडौं महानगरपालिकासित यसअघि भएका सम्झौता कार्यान्वयन नगरिएको भन्दै स्थानीयले अवरोध गरेका थिए । दुर्गन्ध कम गर्न माटो हालेर पुरिएको र फोहोर व्यवस्थापनका लागि गर्नुपर्ने नियमित कार्य गरिने पुनः प्रतिबद्धतासँगै स्थानीयले अवरोध नगरेको प्रमुख श्रेष्ठले बताए ।

“दुर्गन्ध फैलियो, फोहोर व्यवस्थापन गरिएन, झिँगा भन्कियो भन्ने स्थानीयको गुनासो थियो,” उनले भने, “फोहोर व्यवस्थापनका कार्य नियमित गरिनेछ भनेपछि उहाँहरूले अवरोधन नगर्ने हुनुभएको छ ।”

गएको सोमबारदेखि नुवाकोटको ककनी गाउँपालिका–२ र धादिङको धुनीबेँसी नगरपालिका–१ का स्थानीयवासी सडकमा उत्रिएर फोहोरका गाडीलाई अघि बढ्न रोकेका थिए ।

धुनीबेँसी–१ का वडाध्यक्ष मानबहादुर तामाङले पनि फोहोर विसर्जनमा आज कुनै अवरोध नगरिएको जानकारी आफूले पाएको बताए ।

नुवाकोट प्रहरीले पनि फोहोर विसर्जन कार्य आज सामान्य रूपमा भइरहेको जानकारी गराएको छ ।