काठमाडौं । नेपाली कांग्रेसले आफ्ना केन्द्रीय विभाग बढाउने भएको छ । हाल ४८ वटा विभाग रहेको कांग्रेसमा केही विभाग थप गर्न लागिएको हो ।

"हाल कांग्रेसका ४८ वटा विभाग छन् । केही नयाँ विभाग थप्नु पर्नेछ । आजबाट सुरु भएको केन्द्रीय समिति बैठकमा नयाँ विभाग प्रस्ताव हुन्छ र बैठकले पारित गरेपछि आगामी भदौ १५ गतेसम्म सबै विभागलाई पूर्णता दिइनेछ," कांग्रेस पार्टी कार्यालयमा आजदेखि सुरु भएको केन्द्रीय समिति बैठकमा बोल्दै महामन्त्री गगन थापाले भने ।

विभागहरुले आफ्नो कार्यक्षेत्रअन्तर्गत कार्यक्रम बनाएर वार्षिक कार्ययोजना भदौ मसान्तभित्र केन्द्रीय कार्य समितिमा पेस गर्ने पनि उनले जनाए । उनले थप स्पष्ट पारे, "विभागहरुले वर्षभरको प्रगति विवरण ६–६ महिनामा केन्द्रीय कार्यसमितिमा बुझाउनु पर्नेछ ।"