काठमाडौं । कतारबाट सुन ल्याएका एक भरिया त्रिभुवन अन्तर्राष्ट्रिय विमानस्थलबाट बाहिरिँदै गर्दा बाटोबाटै अपहरणमा परेको खुलेको छ । सप्तरीको राजविराज नगरपालिका–१३ का सितेन्द्र यादव अपहरणमा परेका हुन् । उनलाई प्रहरीले उद्धार गरेको छ ।

उपत्यका अपराध अनुसन्धान कार्यालयका प्रमुख (एसएसपी) रानुराम भट्टराईका अनुसार यादवलाई दुई जना युवाले अपहरण गरेर सिनामंगलमा कोठामा लगेर बन्धक बनाएको थिए ।

बन्धक बनाएको सूचना पाएको प्रहरीले उनलाई मंगलबार बिहान उद्धार गरेको हो । पक्राउ परेका दुवै जनलाई कार्यालयले आजै सार्वजनिक गरेको छ ।

पक्राउ पर्नेमा सर्लाहीको मलङ्गावा–३ का २५ वर्षीय अजिम अली र सोही ठाउँका २५ वर्षीय एमडिसनी अलाही छन् ।

यसकारण गरेका थिए अपहरण

सितेन्द्र यादव करिब दुई वर्षदेखि वैदेशिक रोजगारीका लागि कतारमा थिए । कतारको कम्पनी बन्द भएपछि उनी सोमबार नेपाल फर्किंदै थिए । उनी नेपाल फर्किनेबारे जानकारी कतारमै बसेका मनसुर अलीलाई थियो ।

अलीले नेपाल फर्किंदा सुन लगिदिन आग्रह गरे । त्यसबापत नेपालमा उनले १० हजार रुपैयाँ दिलाउने आश्वासन दिए । दश हजार पाउने भएपछि सितेन्द्र अलीको २५ ग्राम बराबरको सुनको सिक्री ल्याउन तयार भए ।

कानुनीरूपमा श्रम स्वीकृति लिएर विदेश गएका नेपालीले स्वदेश आउँदा २५ ग्राम सुन ल्याउन पाउँछन् । अलीले सितेन्द्रलाई बुझाउनुपर्नेको मोबाइल नम्बर पनि दिएका थिए ।

अलीले भनेबमोजिम नै सोमबार साँझ ६:३० बजे त्रिभुवन विमानस्थल ओर्लिएका सितेन्द्रले अलीले दिएको मोबाइलमा फोन गरे । स्कुटरमा आएका एक युवालाई उनले कतारबाट ल्याएको सिक्री बुझाए ।

त्यसको केही समयमै फेरि अजिम अली र एमडिसनी अलाही पुगे । उनीहरूले पनि कतारबाट पठाएको सिक्री मागे । सितेन्द्रले सिक्री स्कुटरमा आएको एक युवालाई बुझाएको बताए । तर, अली र अलाहीले सुन आफ्नो भएको भन्दै आफूले नपाएको भन्दै सितेन्द्रलाई सिनामंगलस्थित आफ्नो कोठामा लिए । सितेन्द्रलाई यातना दिए ।

उनीहरूले चार लाख ८० हजार रुपैयाँ नदिए ज्यान मार्ने धम्की दिए । त्यसका लागि सितेन्द्रकी श्रीमतीलाई फोन गरेर फिरौती बुझाउन दबाब दिए । सितेन्द्रलाई उनीहरूले हातखुट्टा बाँधेर नांगै बनाएर यातना दिइरहेका थिए ।

आफ्नो श्रीमान् अपहरणमा परेकोबारे सितेन्द्रकी श्रीमतीले प्रहरीलाई खबर गरिन् । त्यही सूचनाको आधारमा प्रहरीले सितेन्द्रको उद्धार गरेको हो । प्रहरीको अनुसन्धानबाट पक्राउ परेका अली र अलाही अवैध सुनको कारोबारी रहेको खुलाएको छ । उनीहरूको साथबाट विभिन्न सुनसम्बन्धीका कागजात प्रहरीले पाएको छ ।

प्रहरीले उद्धार गरेपछि पीडित सितेन्द्रले 'नेपाल प्रहरी भगवान्' भएको प्रतिक्रिया दिएका छन् ।

भिडियो हेर्नोस्–