महेन्द्रनगर । कञ्चनपुरको दक्षिणी क्षेत्र बेलौरी नगरपालिकामा दुई समूहबीच खुकुरी हानाहान भएको छ । बेलौरी बजारबाट चार किलोमिटर पूर्व दक्षिणमा पर्ने गोकुलपुरमा शनिबार बेलुकी दुई समूहबीच खुकुरी हानाहान भएको हो । स्थानीय एक पुल हाउसमा भएको खुकुरी हानाहानमा बेलौरीका सुरेश खड्का, पुष्प कुँवर, सुरेन्द्र शाही र सुदीप खड्का घाइते भएका छन् । 

घाइते मध्ये सुरेशलाई काठमाडौं, पुष्प र सुरेन्द्रलाई कोहलपुर थप उपचारका लागि पठाइएको जिल्ला प्रहरी कार्यालय कञ्चनपुरले जनाएको छ । प्रहरीका अनुसार सामान्य घाइते सुदीपलाई सेती अञ्चल अस्पतालले उपचारपछि घर पठाएको छ । 

कञ्चनपुरका प्रहरी नायव उपरीक्षक ज्ञानबहादुर सेठीले यूवाहरुको छुट्टाछुट्टै समूहबीच पुल हाउसमा कुटाकुट भएको पुष्टि गरेपनि खुकुरी भने हानाहान नभएको प्रतिक्रिया दिएका छन् । ‘‘कुटपिटबाट चार जना घाइते भएका छन्, चोट त गहिरो गरी लागेको छ तर खुकुरी प्रहार नै भन्न सकिन्न ।’’ उनले भने । 

घाइते भएका यूवाहरुको उपचार भइरहेको र हान्ने समूह फारार रहेकाले झगडाको कारण खुल्न नसकेको उनको भनाइ छ । प्रहरी नायव उपरीक्षक सेठीले कुटपिटमा संलग्न समूहको पहिचान भइसकेको र खोजी कार्य जारी रहेको बताए ।