काठमाडौं । मुग्लिन–नारायणगढ सडकखण्ड गए राति करिब १२ बजेदेखि अवरुद्ध छ । चितवनको इच्छाकामना गाउँपालिका–५ स्थित तीन नम्बर पुलनजिक पहिरो खस्दा सडक अवरुद्ध भएको हो ।

आज बिहानदेखि पहिरो पन्छाउने कार्य भइरहेको सडक डिभिजन भरतपुरका सूचना अधिकारी चण्डेश्वर साहले जानकारी दिए ।

थप अवरोध नभए अबको करिब डेढ घण्टामा पहिरो पन्छाउने कार्य सकिनेछ । त्यसपछि यातायातका साधन सञ्चालन गराइने उनले बताए ।

“अब डेढ घण्टाजतिमा पहिरो हटाएर सकिन्छ । अहिले पहिरो झर्न रोकिएको छ,” उनले बाह्रखरीसित भने, “यही अवस्थामा डेढ घण्टाजतिमा सडक खुलाउन सकिने अनुमान गरेका छौँ । थप पहिरो झरेको खण्डमा ढिलो पनि हुनसक्छ ।”

पहिरो हटाउन चारवटा ‘मेसिन’ प्रयोग गरिएको उनले जानकारी दिए । उनका अनुसार दुई लोडर र दुई एक्साभेटर पहिरो पन्छाउन प्रयोग गरिएको छ ।

“चारवटा मेसिन प्रयोग गरेर काम गरिरहेका छौँ । बेलाबेलामा पहिरो झर्ने र रोकिने भइरहेको थियो, अहिले स्टेबल (स्थिर) छ,” सूचना अधिकारी साह भने ।

पहिरो पन्छाएर दुईतर्फी नै सवारी आवागमन सञ्चालनको तयारी गरिएको उनले बताए ।

सडक अवरुद्ध हुँदा उक्त सडकखण्डमा ठूलो संख्यामा सवारीसाधन र यात्री रोकिएका छन् ।