काठमाडौं । आमन्त्रित टोली लेबनानले साफ च्याम्पियनसिपमा लगातार दोस्रो जित निकालेको छ ।
आइतबार भारतको बेंग्लुरुस्थित श्री कान्तिराभा रंगशालामा सम्पन्न समूह ‘बी’ को खेलमा भुटानलाई ४–१ ले हराउँदै कुवेतले सेमिफाइन प्रवेशको सम्भावनालाई बलियो बनाएको हो ।
लेबनानको जितमा मह्दी जेइन, खालिल बडेर, अली हाज र मोहम्मद सदेकले समान एक गोल गरे । भुटानको चेन्चो ग्याल्सेनले एक गोल फर्काएका थिए ।
खेलको ११औँ मिनेटमा सदेकले गोल गर्दै लेबनानलाई अग्रता दिलाएका थिए । २४औँ मिनेटमा हाजले गोल गर्दै लेबनानको अग्रतालाई २–० मा पुर्याए । ३५औँ मिनेटमा बडेरको गोलमा लेबनानले अग्रतालाई ३–० मा पुर्याए । यस्तै, ४३औँ मिनेटमा जेइनले गोल गरेपछि लेबनानले अग्रतालाई ४–० मा पुर्याए ।
लगातार दोस्रो हार बेहोरेको भुटानको भने सेमिफाइनल पुग्ने गणितीय सम्भावना मात्र बाँकी छ । भुटान यसअघि पहिलो खेलमा माल्दिभ्ससँग २–० ले पराजित भएको थियो ।
लगातार दोस्रो जित निकालेको लेबनानले पहिलो खेलमा बंगलादेशलाई २–० ले हराएको थियो ।
जितसँगै दुई खेलबाट ६ अंक जोडेको लेबनान समूह ‘बी’ को शीर्ष स्थानमा छ । समान खेलबाट अंकविहीन भुटान तालिकाको पुछारमा छ । यसअघि आजै भएको पहिलो खेलमा बंगलादेशले माल्दिभ्सलाई ३–१ ले हराएको थियो ।
सहभागी आठ टिमलाई दुई समूहमा विभाजन गरिएको छ । समूह ‘ए’मा नेपालसँगै प्रतियोगिताको सर्वाधिक सफल तथा साविक विजेता भारत, पाकिस्तान र कुवेत छन् । समूह ‘बी’मा लेबनान, माल्दिभ्स, भुटान र बंगलादेश छन् ।
च्याम्पियनसिपमा योपटक दुई आमन्त्रित कुवेत र लेबनानसहित आठ टिमले प्रतिस्पर्धा गर्दै छन् । दक्षिण एसियाली क्षेत्रीय सहयोग संगठन (सार्क)मा सात टिम रहे पनि योपटक फिफाको प्रतिबन्धका कारण श्रीलंका प्रतियोगितामा सहभागिताको अवसरबाट वञ्चित छ ।
-1706524096.JPG)
