काठमाडौं । नागरिकता संघर्ष समितिका अध्यक्ष इन्द्रजित साफीसहित चारैजना दाजुभाइले नागरिकता प्राप्त गरेका छन् । सर्वोच्च अदालतले नागरिकता संशोधन ऐन कार्यान्वयन गर्ने बाटो खोलेपछि आइतबार उनीहरूले नागरिकता पाएका हुन् ।
नागरिकता प्राप्त गरेको फोटो सेयर गर्दै उनले सामाजिक सञ्जालमा लेखेका छन्– 'लामो संघर्षपछि नागरिकता पाएको खुसी ।'
उनका बुवा–आमाले जन्मका आधारमा नागरिकता पाएका थिए ।
तत्कालीन राष्ट्रपति विद्यादेवी भण्डारीले संघीय संसद्को दुवै सदनबाट दुईपटक पारित भएको नागरिकता संशोधन विधेयक प्रमाणीकरण नगरी थन्क्याइदिएकी थिइन् । उक्त विधेयकलाई प्रमाणीकरण गर्न सरकारले राष्ट्रपति रामचन्द्र पौडेललाई आग्रह गरेको थियो । त्यसपछि राष्ट्रपति पौडेलले नागरिकता संशोधन विधेयक प्रमाणीकरण गरेका थिए ।
पौडेलको प्रमाणीकरण अवैध रहेको भन्दै सर्वोच्चमा रिट परेको थियो । रिटमा प्रारम्भिक सुनुवाइपछि एकल इजलासले प्रमाणित ऐन कार्यनवयन नगर्न अल्पकालीन अन्तरिम आदेश जारी गरेको थियो । उक्त आदेश बुधबार संयुक्त इजलासले खारेज गर्दै ऐन कार्यन्वयनको बाटो खोलेको हो ।
