काठमाडौं । आईसीसी क्रिकेट विश्वकप छनोटमा श्रीलंकाले ओमानविरुद्ध १० विकेटको सहज जित निकालेको छ ।

शुक्रबार जिम्बाब्वेको बुलावाओस्थित क्विन्स स्पोर्ट्स क्लबमा भएको खेलमा ओमानले प्रस्तुत गरेको ९९ रनको लक्ष्य श्रीलंकाले १५ ओभरमा विकेट नगुमाई पूरा गर्‍यो ।

श्रीलंकाको जितमा ओपनरद्वय दुमुथ करुणारत्नेले ६१ र पथुम निसांको ३७ रन जोडे ।

त्यसअघि टस हारेपछि ब्याटिङमा आएको ओमानले ३०.२ ओभरमा सबै विकेट गुमाएर ९८ रन बनाएको थियो ।

आयान खाले ४१ रन बनाएका थिए । जतिन्दर सिंहले २१ र फयज बटले १३ रन बनाए ।

ओमानलाई सस्तैमा समेट्न वनिन्दु हसरंगाले पाँच विकेट लिए । लहिरू कुमाराले तीन विकेट लिए । कासुन रजिथाले एक विकेट हात पारे ।

जिम्बाब्वेमा जारी छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’ मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

दुई समूहबाट समान शीर्ष तीन टिम सुपर सिक्समा प्रवेश गर्ने छन् । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउने छन् ।