![रेडइटको ८० जीबी डाटा ‘लिक’ गर्ने ह्याकरको चेतावनी, ४५ लाख डलर माग](https://12khari.top/uploads/posts/qfdgdg1687241605.jpg)
काठमाडौं । अमेरिकी सामग्री मूल्यांकन एवं छलफलका लागि चर्चित सोसल मिडिया प्लेटफर्म रेडइटलाई ह्याकरले चेतावनी दिएको छ । गएको फेब्रुअरीमा ह्याकरले कर्मचारीलक्षित ‘फिसिङ’ आक्रमण गरी रेडइटको आन्तरिक डाटामा एक्सेस गरेको थियो ।
सोही डाटाको बदलामा अहिले ह्याकरले एपीआईसम्बन्धी नीति परिवर्तन गर्न र पैसाको माग गरेको हो । ब्ल्याकक्याट नाम गरेको र्यान्समवेयर समूहले फिसिङ आक्रमणको जिम्मा लिएको थियो ।
साइबर अनुसन्धानकर्ता डोमिनिक अल्भेरीले सेयर गरेको पोस्टमा ब्ल्याकक्याटले रेडइटबाट ८० जीबी डाटा चोरी गरेको जिकिर गरिएको छ ।
ह्याकरको समूहले आफ्ना माग पूरा नभए डाटा सार्वजनिक गर्ने धम्की दिएको हो । उनीहरूले ४५ लाख अमेरिकी डलर मागेका छन् ।
गएको हप्ता रेडइटले आफ्नो एपीआई तेस्रो पक्षका एपमा प्रयोग गरबापत शुल्क तोक्दै नयाँ नीति ल्याएको थियो । ह्याकरले सो नीति फिर्ता लिन माग गरेको हो ।
यो नीतिपछि रेडइट विवादित छ । रेडइटभित्रका करिब पाँच हजार कम्युनिटी एवं सब्रेडइटहरू बन्द भएका छन् ।
रेडइटले ह्याकरको चेतावनीका विषयमा कुनै प्रतिक्रिया जनाएको छैन । प्रयोगकर्ताले सार्वजनिक नगरेको डाटामा ह्याकरको पहुँच नभएको कम्पनीले जनाएको छ ।