काठमाडौं । हङकङमा जारी एसीसी महिला इमर्जिङ टिम्स कपमा नेपालले मंगलबार पाकिस्तान ‘ए’ टिमविरुद्ध जितका लागि ८८ रनको लक्ष्य पाएको छ ।

हङकङको मोङकङस्थित मिसन रोड मैदानमा नेपाली महिला टिमले टस जितेर फिल्डिङ गर्ने निर्णय गरेको थियो । त्यसपछि ब्याटिङमा उत्रिएको पाकिस्तान ‘ए’ टिमले १९.२ ओभरमा सबै विकेट गुमाएर ८७ रन बनायो ।

पाकिस्तानका लागि ओपनर शवाल जुल्फिकरले ३६ बलमा २८ रन जोडिन् । कप्तान फतिमा सनाले १६, सदफ शामसले १२ र गुल फेरोजाले ११ रन बनाए ।

नेपालकी इन्दु वर्माले तीन विकेट लिइन् । कविता जोशी, कविता कुँवर र सीता रानामगरले समान दुई विकेट लिए ।

थाइल्यान्डले भिसा समस्याका कारण अन्तिम समयमा नाम फिर्ता लिएपछि नेपालले यो प्रतियोगितामा खेल्ने अवसर पाएको हो । 
एसीसी महिला इमर्जिङ टिम्स एसिया कपमा नेपाली महिला टोलीको यो पहिलो सहभागिता हो ।

प्रतियोगितामा नेपाल समूह ‘ए’मा छ । नेपालले समूहमा हङकङ, भारत र पाकिस्तानविरुद्ध प्रतिस्पर्धा गर्नेछ । दोस्रो खेल नेपालले यही जुन १५ मा भारतसँग खेल्नेछ । नेपालले जुन १७ मा घरेलु टोली हङकङसँग खेल्नेछ ।

समूह ‘बी’मा मलेसिया, यूएई, बंगलादेश र श्रीलंका ‘ए’ रहेका छन् । दुवै समूहबाट शीर्ष दुई टोली सेमिफाइनलमा पुग्नेछन् । सेमिफाइनल जुन १९ मा हुनेछ । फाइनल खेल जुन २१ मा हुनेछ ।