जनकपुरधाम । मधेस प्रदेश सरकार आगामी आर्थिक वर्षको बजेट निर्माणको अन्तिम चरणमा छ ।

संवैधानिक व्यवस्था अनुसार प्रदेश सरकारले असार १ गते बजेट ल्याउनुपर्ने हुन्छ । मधेसले यस वर्ष करिब ३५ अर्बको बजेट ल्याउने तयारी गरिरहेको हो ।

अर्थ मन्त्रालयका सचिव प्रेमप्रसाद भट्टराइले चालु वर्षभन्दा आगामी वर्षमा बजेटको अकार घटेर आउने बताए । उनकाअनुसार २० अर्ब प्रदेश सरकारको र १५ अर्ब संघीय सरकारले दिने अनुदान रकमसहित ३५ अर्बको बजेट ल्याउन लागेको हो ।

सबै मन्त्रालयलाई पठाइएको बजेट सेलिङ र मार्ग दर्शनको अधारमा बजेट निर्माण भइरहेको छ । अधिकांश मन्त्रालयको बजेट निर्माण अन्तिम चरणमा रहेको उनले बताए । केन्द्रले यसवर्ष २२ प्रतिशत बजेट कटौती गरी पठाएको सचिव भट्टराईको भनाई छ ।

संघीय सरकारले पठाएको १५ अर्ब रकम चालु आर्थिक वर्षभन्दा २२ प्रतिशतले कम हो । चालु आर्थिक वर्षमा मधेस सरकारले ४६ अर्ब ९१ करोड ४८ लाख ८८ हजारको बजेट ल्याएको थियो । चालु आर्थिक वर्षमा भएको खर्च अवस्था र राजस्व संकलनका आएको गिरावटका कारण बजेट घटेको उनले बताए ।

सरकारले ल्याउन लागेको बजेटमा नयाँपन योजना पनि समावेश गरिएको छ । खानेपानी मन्त्रालय अन्तर्गत ‘वाटर एटीएम’ योजना राखिएको छ । यस योजनाले करिब २०० सार्वजनिक ठाउँमा शुद्ध खानेपानीको व्यवस्था गर्नेछन् ।

आर्थिक वर्ष २०८०/०८१ मा करिब दश ठाउँमा वाटर एटीएम बनाइने सरकारको लक्ष्य छ ।  सबैभन्दा बढी बजेट भौतिक पुर्वाधार विकास मन्त्रालयमा राखिएको छ । यद्यपि स्वास्थ्य, शिक्षा र कृषिलाई प्राथमिकतामै राखेर बजेट निर्माण गरिएको सचिव भट्टराइले बताए ।

मधेसका प्रदेश प्रमुख हरिशंकर मिश्रले प्रदेशसभामा गत मंगलबार १८९ बुँदे नीति तथा कार्यक्रम प्रस्तुत गरेका थिए । सो नीति तथा कार्यक्रममाथि तीन दिन संसद्मा छलफल भई गत शुक्रबार सांसदहरूले पारित गरेका थिए । यस नीति तथा कार्यक्रममा नेकपा (माओवादी केन्द्र)ले असहमति जनाउँदै आएका छन् । सोही कारण माओवादी केन्द्रका सांसदहरूले नियमित दुई वटा बैठक नै बहिष्कार गरेका थिए ।