काठमाडौं । नेपालमा हुने दोस्रो साउथ एसियन चेस च्याम्पियनसिप–२०२३ भोलि (मंगलबार) देखि सुरु हुने भएको छ ।

सोमबार पत्रकार सम्मेलनमार्फत आयोजक नेपाल बुद्धिचाल महासंघले च्याम्पियनसिपको बारेमा जानकारी दिएको हो । असार ४ गतेसम्म सञ्चालन हुने प्रतियोगितामा नेपालसँगै, भारत, पाकिस्तान, भुटान, माल्दिभ्स, बंगलादेश, श्रीलंका र अफगानिस्तान गरी आठ टिमले सहभागिता जनाउनेछन् ।

प्रतियोगितामा खुला तथा महिला गरी दुई स्वर्णका लागि प्रतिस्पर्धा हुनेछ । ललितपुरको गोदावरीस्थित भ्यू भृकुटीमा सञ्चालन हुने प्रतियोगितामा प्रत्येक देशबाट समान एक महिला र पुरुष खेलाडी, डिफेन्डिङ च्याम्पियन र आयोजकको हैसियतमा थप एक–एक जना खेलाडीसहित दुवै विधामा समान १० खेलाडीले प्रतिस्पर्धा गर्नेछन् ।

च्याम्पियनसिपको खुलातर्फ नेपालका वर्तमान च्याम्पियन फिडेमास्टर रुपेश जयसवाल र रनरअप सुरवीर लामा सहभागी हुनेछन् । यस्तै, महिलातर्फ नेसनल च्याम्पियन फिडेमास्टर सुजना लोहनी र रनरअप सुशिला गुरुङको सहभागिता रहनेछ ।

च्याम्पियनसिपको खुलातर्फको विजेताले एक लाख ५० हजार, उपविजेताले एक लाख र तेस्रो हुनेले ५० हजार रुपैयाँ पुरस्कार पाउनेछन् । यस्तै, महिलातर्फको विजेताले एक लाख, उपविजेताले ६० हजार र तेस्रो हुनेले ४० हजार रुपैयाँ पुरस्कार प्राप्त गर्नेछन् ।

च्याम्पियनसिपका लागि राष्ट्रिय खेलकुद परिषद् (राखेप), ललितपुर महानगरपालिकालगायत अन्य स्थानीय तहको सहयोग रहेको आयोजकले बताए ।