काठमाडौं । नेपाल एयरलाइन्सको काठमाडौं–रियाद–काठमाडौं उडान रोकिने भएको छ । नेपाल एयरलाइन्सले २२ अप्रिल २०२२ बाट काठमाडौं–रियाद–काठमाडौं उडान सुरु गरेको हो । 

अहिले काठमाडौं–रियाद–काठमाडौं उडान नेपाल एयरलाइनसको आरए १५८ सिट क्षमताको विमानले उडान गर्दै आइरहेको छ ।  जिएसएमार्फत् ‘पार्किङ स्लट’ लिँदै नेपाल एयरलाइन्सले काठमाडौं–रियाद–काठमाडौं उडान सुरु गरेको थियो । 

नेपाल एयरलाइन्सले सुरुमा साताको तीन उडान गर्दै आएको थियो ।  रियादमा ‘पार्किङ स्लट’ नपाएपछि त्यहाँ गर्दै आएको उडान जुलाई १ तारिखबाट अन्यत्र ठाउँबाट उडान भर्ने तयारी गरिरहेको उच्च स्रोतले जानकारी दियो ।

अक्कुपेन्सी हुँदाहुँदै पनि अहिले नेपाल एयरलाइन्सले काठमाडौं–रियाद–काठमाडौंको उडान साउदीको अर्काे सहर दमामबाट उडान गर्ने तयारी गरिरहेको छ ।  सुरुमा सातामा तीन उडान गरे पनि पछिल्लो समय पार्किङ ‘स्लट’ नपाउँदा एउटा उडानमा सीमित हुन पुगेको छ । 

स्रोतले दिएको जानकारीअनुसार अहिले काठमाडौं–रियाद–काठमाडौं उडानमा अक्कुपेन्सी ८० प्रतिशत छ । जबकि ७० प्रतिशत भन्दा बढी अक्कुपेन्सीलाई नाफाको रुपमा लिइन्छ । नेपाल एयरलाइन्सले आगामी जुन २९ तारिखसम्म रियादमा अन्तिम उडान तयारी गरिरहेको स्रोतले जानकारी दियो ।

अर्थात् जुलाई एक तारिखबाट नेपाल एयरलाइन्सले काठमाडौं–दमाम–काठमाडौं उडान भर्ने गरी तयारी गरिरहेको छ ।  रियादमा एयरलाइन्सले पार्किङ स्लट भनेको समयमा नपाउने र उनीहरूले दिएको समयमा उडान गर्नुपर्ने भएपछि अर्काे सहरबाट उडान गर्ने तयारी गरिरहेको छ ।

रियाद सहर साउदीको राजधानी हो । रियाद–दमामको दुरी ४१० किलोमिटर हो ।  साताको तीन उडान सुरु गरेको नेपाल एयरलाइन्सले अहिले उनीहरूले दिएको समयअनुसार सातामा कहिले दुई त, कहिले एक उडान गर्दै आइरहेको छ । 

सरोकारवाला निकायले चासो नदेखाउँदा सातामा तीन उडान गर्ने भनिए पनि अहिले एउटामात्र उडान हुँदै आइरहेको छ ।  

“हामीले साउदीमा रहेको नेपाली राजदूतावासलाई पनि उडान नसार्न भन्दै ज्ञापनपत्र बुझाएका छौं । जीएसएसँग पनि कुराकानी गर्‍यौँ तर जिएसएका कर्मचारीले पनि हामीलाई हैन, नेपालले कुनै पनि रेस्पोन्स गरेको छैन भन्नुभयो,” एनआरएनएका एक सदस्यले बाह्रखरीसँग भने । 

नेपाली यात्रु मारमा पर्न सक्छन् !  

नेपाल एयरलाइन्सको काठमाडौं–रियाद–काठमाडौं उडान सार्ने भएपछि रियादमा रहेका नेपाली यात्रु मारमा पर्ने ती सदस्यले बताए ।  नेपालीहरूको वैदेशिक रोजगारीको गन्तव्यमध्ये साउदी पनि प्रमुख गन्तव्य हो । 

अहिले वैदेशिक रोजगारीको सिलसिलामा साउदी अरबमा चार लाख बढी नेपाली मजदुर कार्यरत छन् ।  जसमध्ये साउदीका राजधानी रियादमा मात्र एकलाख २० हजार नेपाली मजदुर कार्यरत छन् ।  राष्ट्रिय ध्वजावाहक विमान नेपाल एयरलाइन्सले साउदीबाट सीधा काठमाडौं उडान हुँदा धेरै सहज हुन गरेको गैरआवासीय नेपाली संघ, समन्वय परिषद् रियाद (एनआरएनए) का अध्यक्ष महेश घिमिरेले बताए । 

केही दिन अगाडि एनआरएनएका टोली साउदीमा रहेको विभिन्न १८ संघसस्थाले नेपाली राजदूतावसमा रियादको उडान नसार्न भन्दै ज्ञापनपत्र समेत बुझाएको थियो ।

“अहिलेको हामी रियादमा एक लाख २० हजार नेपाली बस्दै आएका छौं । राष्ट्रिय ध्वजावाहकको जहाजबाट जाँदा हामी पनि सहज थियो,” उनले भने, “अरुले ३० केजी तौल दिँदै आएकामा नेपाल एयरलाइन्सले ४० प्लस सात केजी तौल दिँदै आएको थियो ।”