काठमाडौं । नेपाली राष्ट्रिय महिला भलिबल टिमकी कप्तान अरुणा शाहीले भारत र काजखस्तानसँगको खेलबाट बलियो टिमसँग कसरी खेल्नुपर्छ भन्ने अनुभव हासिल गरेको बताएकी छन् । सेन्ट्रल एसियन भलिबल एसोसिएसन (काभा) महिला भलिबल च्यालेन्ज कप–२०२३ मा त्यस्तो अनुभव हासिल गरेको उनले उल्लेख गरिन् ।

नेपाल यो प्रतियोगिताको पछिल्ला दुई संस्करणको विजेता हो । तर, योपटक सेमिफाइनलमा काजखस्तानसँग पराजित भएपछि उपाधिमा ह्याट्रिक गर्नबाट चुक्यो । काठमाडौंमा जारी प्रतियोगितामा आइतबार तेस्रो स्थानका लागि भएको खेलमा भने नेपालले उज्वेकिस्तानलाई ३–१ को सेटमा हरायो ।

• उज्वेकिस्तानलाई हराउँदै नेपाल तेस्रो 

समूह ‘ए’को उपविजेताका रूपमा सेमिफाइनलमा प्रवेश गरेको नेपाल काजखस्तानसँग ३–२ को सेटमा हारेको थियो । त्यसअघि, समूह चरणमा नेपाल भारतसँग ३–१ को सेटमा पराजित भएको थियो ।

आइतबार उज्वेकिस्तानको खेलपछि प्रतिक्रिया दिँदै कप्तान अरुणाले प्रतियोगिता समग्र रूपमा राम्रो भएको बताइन् ।

“प्रतियोगितामा आफूभन्दा राम्रो टिमसँग खेल्न पाउँदा हामीले राम्रो अनुभव लिन पायौँ । यसले अबका दिनमा अरू टिमसँग खेल्न सजिलो हुन्छ जस्तो लाग्छ । टिमको रूपमा धेरै कुराहरू सिक्न पायौँ । घरमै भएको प्रतियोगितामा फाइनल पुग्ने मौका गुमाउँदा नराम्रो लागिरहेको छ,” उनले भनिन्, “एसियन गेममा हामीभन्दा उच्चस्तरका टिमसँग प्रदर्शन गर्नुपर्ने हुन्छ । त्यसकारण भारत र काजखस्तानजस्ता शारीरिक रूपमा उच्चस्तरका टिमसँग खेल्दा बलियो टिमसँग कसरी खेल्नपर्छ भन्ने अनुभव पाएका छौँ । यसले एसियन गेममा सजिलो हुन्छ जस्तो लाग्छ ।”

अरुणाले प्रतियोगितामा नयाँ खेलाडीले पनि राम्रो प्रदर्शन गरेको बताइन् । उनीहरूको प्रदर्शनबाट आफू सन्तुष्ट रहेको उनले सुनाइन् ।

“नयाँ सबै खेलाडीको प्रदर्शनबाट खुसी छु । किनभने, पहिले टिममा भए पनि खेलको अनुभव भने पाउनुभएको थिएन । अहिले बलियो टिमसँग खेल्दा पनि उहाँहरूले राम्रो प्रतिस्पर्धा दिइरहनुभएको थियो । टिमको रूपमा सबैको प्रदर्शनबाट खुसी छु । सबैले राम्रो खेल्नुभएको छ,” अरुणाले थपिन् ।

नेपाली टिमका मुख्य प्रशिक्षक यान ब्रान्ड्टले पनि प्रतियोगिताबाट आफूले राम्रो अनुभव लिन पाएको बताए । नेपाली टिमले राम्रो आधार बनाएको उनले प्रतिक्रिया दिए ।

“यो मेरो लागि निकै राम्रो अनुभव रह्यो । नेपालमा तीन खेल जित्न यो टिमसँगको सहकार्य राम्रो रह्यो । र, यो प्रतियोगितामा सुखद नतिजा ल्याउन पनि सफल भयौँ,” ब्रान्ड्टले भने, “नेपाली टिमको यो राम्रो आधार र सुरुआत हो । टिममा १४ खेलाडी छन् र हामीले अझै चार–पाँच खेलाडी खोज्नुपर्छ । हामीले अग्ला खेलाडी खोज्नुपर्छ । तर, केही महिनामै उनीहरूलाई पाउन सहज छैन । किनकि, उनीहरू प्राविधिक रूपमा पनि राम्रो हुनुपर्छ । हामीले जुलाईदेखि १८ देखि २० खेलाडीलाई लिएर तयारी सुरु गरेका थियौँ । र, अहिले बाँकी खेलाडीलाई अहिले रहेका १४ भित्र पर्न सहज छैन । मलाई लाग्छ, यो टिम निकै उच्च बनिसकेको छ ।”

उनले उज्वेकिस्तानविरुद्ध पहिलो सेट राम्रो हुन नसके पनि त्यसपछि टिमले उत्कृष्ट प्रदर्शन गरेको बताए ।

“हामीले सहजै जित्यौँ । मलाई लाग्छ, हामीले भारत र काजखस्तानविरुद्धको खेलबाट नेपालले पनि फाइनल खेल्न सक्थ्यो भन्ने प्रदर्शन देखायौँ । उज्वेकिस्तानको स्तर केही तल छ । तर, उनीहरूले पहिलो सेट राम्रो खेले । पहिलो सेटमा हामीले राम्रो खेल्न सकेनौँ । त्यसपछिका तीन सेटमा भने हामीले राम्रो प्रदर्शन देखायौँ । पहिलो सेटमा हामीले धेरै मिस्टेक गर्‍यौँ । डिफेन्समा अपेक्षाकृत प्रदर्शन भएन । दोस्रो सेटपछि हामीले सर्भिसमा योजना परिवर्तन गर्‍यौँ । मलाई लाग्छ, हामीले दोस्रो सेटपछि उज्वेकिस्तानलाई डोमिनेट गर्‍यौँ । र, खेल नै सजिलो बन्यो,” ब्रान्ड्टले भने ।