काठमाडौं । नेकपा (एमाले)ले संसद् अवरोध गरेको छ । पशुपतिमा केपी शर्मा ओली प्रधानमन्त्री हुँदा चढाइएको जलहरी सुन भनेर पित्तल चढाएको आरोप नेकपा (माओवादी केन्द्र)का सांसद लेखनाथ दाहालले लगाएको भन्दै एमालेले संसद् अवरोध गरेको हो ।

अघिल्लो बैठकमा माओवादी सांसद दाहालले लगाएको आरोपमा एमालेले आज बैठक अवरोध गरेको हो ।

सांसद दाहालले नीति तथा कार्यक्रमका विषयमा बोल्ने क्रममा पशुपतिको जलहरीमै भ्रष्टाचार भएको आरोप लगाएका थिए । त्यसका विषयमा त्यसदिन नियमापत्ति समेत नगरेको एमालेले शुक्रबारको बैठकअघि नै बैठक चल्न नदिने घोषाा गरेका थियो । लामो वार्ता गर्दा करिब डेढ घण्टा ढिलो सुरु भएको बैठकमा एमालेले अवरोध गरेको हो ।

“सत्तापक्षका माननीज्यूहरुले रोष्ट्रममा उभिएर प्रतिपक्षमाथि आक्षेप लगाउने काम गर्नुभएको छ । पशुपतिमा सुनको जलहरीको नाममा पित्तलको जलहरी चढाएर भ्रष्टाचार गरेको आरोप लगाउनुभएको छ,” एमालेका प्रमुख सचेतक पदम गिरीले भने, “प्रतिपक्षले सत्तापक्षमाथि आरोप लगाउँछ । यहाँ त सत्तापक्षले प्रतिपक्षमाथि आक्षेप लगाउँदै छ । पशुपतिको गजुरमा सुनको ठाउँमा पित्तल लगाएको छ भने छानबिन होस् । सरकारले त्यो सुन हो कि पित्तल हो भनेर जवाफ दिनुपर्छ ।”

उनले गम्भीर आरोप लगाएर बैठक चल्न नसक्ने भन्दै जवाफपछि मात्र संसद्को अवरोध अन्त्य गर्ने बताएका थिए ।

“सभामुख महोदय गम्भीर आरोप बोकेर बैठक चल्न सक्दैन,” गिरीले भने, “बैठक चलाउन खोजियो भने बेल घेर्नुपर्ने हुन्छ ।”f