काठमाडौं । साताको दोस्रो कारोबार दिन सोमबार नेप्से परिसूचक ८.१० अंक बढेर बन्द भएको छ । नेप्से परिसूचक वृद्धि भए पनि यस दिन कारोबार रकममा भने कमी आएको छ । 

यसदिन २७२ धितोपत्रको ३४ लाख ९५ हजार ७५२ कित्ता खरिद–बिक्री भएको नेप्सेले जनाएको छ । आज लगानीकर्ताको कूल सम्पत्ति मूल्य (कूल बजारपुँजीकरण) २७ खर्ब ५९ अर्ब १४ करोड रुपैयाँ कायम भएको छ ।

नेपाल स्टक एक्सचेन्ज (नेप्से)का अनुसार आज आइतबारको तुलनामा कारोबार रकम ३३ करोड रुपैयाँ घटेको हो ।

आइतबार एक अर्ब ६० करोड रुपैयाँको सेयर करोबार भएको थियो । आज एक अर्ब २७ करोड रुपैयाँको सेयर खरिद–बिक्री भएको छ । यसदिन शिवम् सिमेन्टको कारबोर रकमले बढी हिस्सा ओगटेको छ । यो कम्पनीको सात करोड ३४ लाख रुपैयाँको सेयर खरिद–बिक्री भएको नेप्सेले जनाएको छ ।

त्यस्तै, आज सर्वाधिक सेयर मूल्य वृद्धि हुनेमा आत्मनिर्भर लघुवित्त वित्तीय संस्था लिमिटेड रहेको छ । यो कम्पनीको सेयर मूल्य १० प्रतिशतले वृद्धि भएको छ । अघिल्ला दिनहरूमा पनि यो कम्पनीको सेयर मूल्य लगातार उकालो लाग्दै आएको छ । त्यस्तै ग्रिन लाइफ हाइड्रोपावरको सेयर मूल्य ७.३७ प्रतिशतले घटेको छ ।

कारोबारमा आएका १३ उपसमूहमध्ये दुई उपसमूहको परिसूचक घटेको छ । परिसूचक घट्नेमा व्यापार र वाणिज्य बैंक समूह रहेका छन् । व्यापार समूहको ०.९९ प्रतिशत र वाणिज्य बैंक समूहको परिसूचक ०.०२ प्रतिशत घटेको छ ।

परिसूचक सर्वाधिक वृद्धि हुनेमा उत्पादन तथा प्रशोधन समूह रहेको छ । यो समूहको परिसूचक २.४४ प्रतिशतले वृद्धि भएको छ ।