काठमाडौं । म्यानचेस्टर सिटी दोस्रोपटक च्याम्पियन्स लिगकाे फाइनलमा पुगेको छ । बर्नार्डो सिल्भाले दुई गोल गरेको खेलमा सिटीले बुधबार राति इत्तिहाद रंगशालामा साविक विजेता रियल मड्रिडलाई ४–० तथा समग्रमा ५–१ ले हराउँदै फाइनलमा स्थान बनाएको हो । सिटी पछिल्लो तीन सिजनमा दोस्रो पटक च्याम्पियन्स लिगको फाइनलमा पुग्न सफल भएको हो ।  

सिल्भाको पहिलो हाफमै दुई गोल गरेपछि खेल सिटीको नियन्त्रणमा गयो । कीर्तिमानी १४ पटकको युरोपेली च्याम्पियनविरुद्ध सिटीले २३औँ मिनेटमा सिल्भाको गोलबाट अग्रता लिएको थियो । ३७औँ मिनेटमा सिल्भाले अग्रता दोब्बर बनाए । ७६औँ मिनेटमा एडर मिलिटाओले आत्मघाती गोलमा सिटीले अग्रता बढायो । वैकल्पिक खेलाडी जुलियन अल्भारेजले इन्जरी समयमा अर्को गोल थपेपछि सिटीले शानदार विजय हासिल गर्दै फाइनलमा स्थान पक्का गरेको हो । अल्भारेज ८९औँ मिनेटमा इर्लिङ ब्राउट हालान्डको स्थानमा मैदान छिरेका थिए । 

यससँगै पेप ग्वार्डिओलाको सिटीले स्पेनिस क्लब रियालसँग गत वर्ष सेमिफाइनलमा हरेको बदला लिन सफल भएको छ । गत सिजन रियालले सिटीलाई समग्रमा ६–५ ले हराउँदै फाइनलमा स्थान बनाएको थियो । सिटीले अब फाइनलमा इटालियन क्लब इन्टर मिलानविरुद्ध टर्कीको स्तानबुलमा प्रतिस्पर्धा गर्नेछ । इन्टरले इटालीकै अर्को क्लब एसी मिलानलाई हराउँदै फाइनलमा स्थान पक्का गरेको थियो । 

‘‘उनीहरूले हामीभन्दा धेरै राम्रो खेले । सिटी जितको हकदार थियो,’’ रियाल मड्रिडका प्रशिक्षक कार्लो एन्सेलोट्टीले भने, ‘‘उनीहरूले सुरुबाट धेरै दबाब सिर्जना गरे । त्यसले उनीहरूलाई सहज बनायो किनभने हामीलाई बल खेल्न धेरै गाह्रो भयो । सिटीले पहिलो हाफमा दुई गोलको अग्रता लिएपछि हामीलाई खेलमा फर्किन धेरै गाह्रो भने । दोस्रोमा पुनरागमनको प्रयास गरेका थियौं तर, सफल भएनौं ।’’

एन्सेलोटीले नतिजा पीडादायी भएको र के गलत भएको भनेर विश्लेषण गर्न हतार हुने बताए । 

“यो क्षणमा खेलको मूल्यांकन गर्नुको कुनै अर्थ छैन,’’ एन्सेलोट्टीले थपे, “यो हार हो । जसले धेरै पीडा दिन्छ । हामी च्याम्पियन्स लिगको सेमिफाइनलमा बलियो प्रतिद्वन्द्वीविरुद्ध हार्यौं । उनीहरूले राम्रो खेले र हामीलाई फाइनल पुग्नबाट रोके । यसबाट हामीले अर्को सिजनका लागि सिक्नुपर्छ ।’’

गत सिजन ला लिगा र च्याम्पियन्स लिग उपाधि जितेको रियाल मड्रिड यस सिजन स्पेनिस कप र फिफा क्लब वर्ल्ड कपको उपाधि मात्र जित्न सफल भएको छ । स्पेनिला ला लिगाको उपाधि बार्सिलोनाले चार खेल अगाडि नै जितिसकेको छ । 

तथापि, एन्सेलोट्टीले बुधबार अर्को कीर्तिमान बनाएका छन् ।  म्यानचेस्टर युनाइटेडका पूर्व प्रशिक्षक एलेक्स फर्गुसनको कीर्तिमान तोड्दै एन्सेलोट्टी युरोपियन प्रतियोगितामा सबैभन्दा धेरै १९१ खेलमा प्रशिक्षक बनेका छन् । 

च्याम्पियन्स लिगको फाइनलमा सिटीलाई बलियो उपाधि दाबेदार मानिएको छ । इन्टरलाई हराए सिटीले पहिलोपटक च्याम्पियन्स लिगको उपाधि जित्नेछ । सिटी दुई वर्षअघि फाइनलमा इङ्लिस क्लब चेल्सीसँग पराजित भएको थियो । सिटी यसपटक ट्रेबल (तेहेरो) उपाधि जित्ने अभियानमा छ । 

सिटीले यस सिजन च्याम्पियन्स लिग, इङ्लिस प्रिमियर लिग र एफए पकको उपाधि जित्ने सम्भावना बलियो बनेको छ । 

“आज धेरै राम्रो भयो । थाहा छैन किन तर मैले महसुस गरेँ की टिम उच्चस्तरमा प्रतिस्पर्धा गर्न तयार छ,’’ सिटीका प्रशिक्षक पेप ग्वार्डिओलाले ट्रेबल उपाधि सम्भावना बारे भने, “हामी नजिक छौं । यो सिजन साँच्चै राम्रो छ । हामी हाम्रा प्रशंसकहरूलाई खुसी बनाउँछौं । संसारभरका हाम्रा प्रशंसकहरू हामीलाई हेरिरहेका छन् । उनीहरूले राम्रो देख्छन् । यो सबैभन्दा ठूलो प्रशंसा हो ।’’