काठमाडौंं । नेकपा (एमाले)का अध्यक्ष केपी शर्मा ओलीले सरकार संकटले घेरिएको बताएका छन् । मदन–आश्रित स्मृति दिवसका अवसरमा बुधबार बल्खुमा आयोजित कार्यक्रममा उनले यस्तो बताएका हुन् ।

“सरकार संकट नै संकटले घेरिएर धेरै मुख भएको सर्पको पेटमा पर्ने स्थिति छ । तर, सरकार बेखबर छ,” उनले भने ।

ओलीले अहिलेको राजनीतिलाई हल्काफुल्का रूपमा लिन खोज्नु दुःखद विषय भएको बताए । नेपाली कांग्रेस किंकर्तव्यविमूढ भएको आरोप पनि उनले लगाए ।

“नेपाली कांग्रेस भन्ने एउटा पार्टी छ, आवा न चावाको । त्यो कुनै राजनीतिक संज्ञा दिन पनि मन लाग्न छाडिसक्यो, त्यो पार्टीलाई । आवा न चावाको पार्टी,” उनले भने, “देश गम्भीर अवस्थामा छ । त्यत्रो इतिहास बोेकेको कांग्रेस किंकर्तव्यविमूढ छ । भोलि उठी कहाँ जाने केही थाहा छैनजस्तो ।”

उनले एमाले एक्लैले अहिलेको परिस्थितिसँग जुध्नुपर्ने जिकिर गरे । सत्ताका लागि एमालेले अरू पार्टीसँग नमिल्ने उनको भनाइ छ ।

“हामी कसैसँगै कहिल्यै मिल्दैनौँ भन्ने कुरा होइन । तर, सत्ताका निम्ति, सत्तास्वार्थका लागि, सरकार गठनका लागि मिल्ने कुरा हामीबाट हुँदैन । कसैसँग हाम्रो एकता हुन्छ भने देश, जनता, परिवर्तन, सुशासनका लागि मिल्न सक्छौँ,” ओलीले भने ।

वर्तमान सत्ता गठबन्धन लक्ष्यविहीन भएको टिप्पणी उनले गरे ।