काठमाडौं । अर्जेन्टिनाका कप्तान लियोनल मेसीले क्लबको अनुमति विना साउदी अरबको भ्रमण गरेपछि पेरिस सेन्ट जर्मेन (पीएसजी)ले दुई साताका लागि निलम्बन गरेको छ । 

गत आइतबार लिगमा लोरियन्टसँग घरेलु मैदानमै पराजित भएपछि मेसी साउदी अरबको भ्रमणमा निस्किएका थिए । उक्त खेलमा मेसीले ९० मिनेट मैदानमा बिताएका थिए । अब मेसीले यस निलम्बनको समयमा पीएसजीमा प्रशिक्षण पनि गर्ने छैनन् । 

मेसीले व्यवसायिक प्रयोजनका लागि साउदी भ्रमणका लागि अनुमति मागेका थिए । तर, क्लबले अनुमति दिन अस्विकार गरेको बुझिएको छ । साउदी अरबको पर्यटन दूत भएको भन्दै क्लबले यसअघि पनि मेसीलाई जरिबाना गरेको थियो । 

विश्वकप विजेता फरवार्ड मेसीको पीएसजीसँगको दुई वर्षे सम्झैता यस सिजनको अन्त्यसँगै समाप्त हुँदै छ । २०२१ मा पहिलोपटक पीएसजी आउँदा मेसीले तेस्रो सिजनका लागि विकल्पमा राखेका थिए । र, क्लबका अधिकारीहरू मेसीसँगको सम्झैता नवीकरण नगर्ने निर्णयमा पुगेको जनाइएको छ । 

मेसीले पीएसजीबाट सबैखाले प्रतियोगितामा गरी ७१ खेलमा ३१ गोल गरिसकेका छन् । ३४ गोलमा अवसर सिर्जना गरिदिएका छन् । उनले गत सिजन पीएसजीबाट लिग वानको उपाधि पनि जितेका थिए । बार्सिलोनाका उपाध्यक्ष राफेल युसटेले मेसी अर्को सिजन पुनः बार्सिलोना फर्किने बताउँदै आएका छन् । 

निलम्बनमा परेका मेसीले अब लिग वानमा ट्रोया र अजाक्सियोविरुद्धको खेल गुमानेछन् । पीएसजी लिगमा ३३ खेलबाट ७५ अंक जोडेर शीर्ष स्थानमा छ । जुन दोस्रो स्थानको मार्सेभन्दा पाँच अंकले माथि हो ।