चन्द्रदीप लामिछाने

यो सृष्टि तथा चराचरजगत्का  
प्राणी र वनस्पति 
सम्पूर्णलाई नयाँ वर्षको शुभकामना 
वनस्पति, 
जीवजन्तुको सामान्य र स्वतन्त्र जीवनचक्रमा 
बाँच्न पाउने अधिकारलाई शुभकामना ।

मेरो सगरमाथा र सम्पूर्ण हिमालका चुचुराहरूलाई 
नयाँ वर्षको रोमाञ्चक र साहसिक शुभकामना 
ती हिमकणहरू अविछिन्न यथास्थितिमा रहिरहून् 
र, नदीको जीवनचक्र सदा सन्तुलित रहिरहोस् 
नयाँ वर्षको शुभकामना ।

मभन्दा पर रहेको समुद्रलाई पनि 
नयाँ वर्षको असीमित शुभकामना 
अब कुनै सहरले पानीभित्र विलीन हुनु नपरोस् 
र ठूलाठूला सुनामीहरूको त्रास पृथ्वीले भोग्नु नपरोस् 
नयाँ वर्षको शुभकामना ।

अन्टार्टिकाको विशाल हिउँको पटाङ्गिनीलाई 
नयाँ वर्षको शुभकामना 
त्यहाँको हिउँ सदासर्वदा जस्ताको तस्तै रहिरहोस् 
हिउँभित्र पुरिएर रहेका ब्याक्टेरियाहरू सदाका लागि शान्त रहिरहून् 
शुभकामना ।

विश्वका सम्पूर्ण देशहरूलाई नयाँ वर्षको शुभकामना 
युद्धको अन्त्यका लागि शुभकामना 
शान्ति तथा मेलमिलापको दिगो जीवन्तताका लागि शुभकामना ।

महान् प्रकृतिलाई यो नयाँ वर्षको फेरि पनि शुभकामना 
प्रकृतिका अनमोल रत्नहरूलाई शुभकामना 
तिनका सामान्य जीवनचक्रको अपेक्षालाई शुभकामना 
वन, जंगल, नदी, फाँट, ताल, तलैया, हिमाल, पहाड, तराई 
सबैसबैलाई शुभकामना ।

आकाश, वायु, बादल र वायुमण्डल 
सबैको नियमित निरन्तरताका लागि शुभकामना 
टाढाको अन्तरिक्ष, चन्द्र, सूर्य र आकाशगंगाका सदस्यहरू 
सबैलाई आ–आफ्नो नियमितताको शुभकामना ।
अन्तरिक्ष स्टेसनमा खोज र अनुसन्धानका लागि 
क्रियाशील मित्रहरूलाई सफलताको शुभकामना ।

शुभकामना, ती महान् वैज्ञानिकहरूलाई 
जसका आविष्कारले जीवनरक्षा, खुसी, सुखी 
र भविष्य मार्गदर्शनमा योगदान दिए ।

एन्थोनी फाउचीलाई शुभकामना 
एलन मस्कलाई शुभकामना 
बिल गेट्स, ज्याक मा, जुगरबर्ग, रतन टाटा सबैलाई शुभकामना 
मानव अस्तित्वको स्वीकारोक्तिलाई शुभकामना 
मंगल अभियानलाई नयाँ वर्षको शुभकामना । 

महान् आमा र बाबालाई शुभकामना 
प्रिय मित्र तथा आफन्तजनलाई शुभकामना 
यो जन्म र जन्मान्तरलाई शुभकामना 
नयाँ वर्ष तिमीलाई पनि शुभकामना  
हामी सबैसबैलाई शुभकामना ।
(उपप्राध्यापक/त्रिभुवन विश्वविद्यालय)