काठमाडौं । विम्बल्डन च्याम्पियन एलेना रिबाकिना र पाँचौँ वरीयताप्राप्त आर्यना साबलेन्काले अस्ट्रेलियन ओपनमा महिला एकल स्पर्धामा उपाधिका लागि प्रतिस्पर्धा गर्ने भएका छन् । 

२३ वर्षीया रिबाकिनाले दुई पटकको विजेता भिक्टोरिया अजारेन्कालाई ७–६ (७/४), ६–३ को स्कोरमा पराजित गर्दै फाइनलमा स्थान बनाएकी हुन् । अजारेन्का १० वर्षपछि उपाधि जित्ने आशामा थिइन् । तर, रिबाकिनाले उनको आशालाई सफल हुन दिइनन् । 

बेलारुसकी साबालेन्काले पोल्यान्डकी म्याग्डा लिनेटलाई हराउँदै पहिलोपटक फाइनलमा स्थान बनाएकी हुन् । २४ वर्षीया साबलेन्काले लिनेटलाई ७–६(७÷१), ६–२ को स्कोरमा हराएकी हुन् ।

जितपछि साबालेन्काले भनिन्, “मैले राम्रो सुरुवात गरेँ भन्न चाहन्नँ । तर टाइब्रेकमा मैले आफ्नो लय फेला पारेँ । आफूमाथि भरोसा राखेँ । आफ्नो लय समाउन थालेँ ।”

२२ औँ वरीयताप्राप्त रिबाकिनाले गत वर्ष अल इङ्ल्यान्ड क्लबमा आफ्नो जितपछि दोस्रो पटक ठूलो प्रतियोगिताको फाइनलमा प्रतिस्पर्धा गर्न लागेकी हुन् । 

“म फाइनलमा पुग्न पाउँदा धेरै खुसी छु । यहाँ फेरि एकपटक खेल्न पाउँदा धेरै खुसी छु,“ रिबाकिनाले भनिन्, “यो फरक अवस्था थियो । मैले आक्रामक टेनिस खेल्न सकिँन । तर म जित्न पाउँदा खुसी छु । मैले विम्बल्डनबाट धेरै अनुभव पाएँ । म कोर्टमा फाइनलका लागि आउन चाहन्छु । त्यो क्षणको आनन्द लिन चाहन्छु ।”