काठमाडौं । सातौँ वरीयताका दिनेश प्रजापतिले बिहीबार सूर्य नेपाल गल्फ टुरको तेस्रो प्रतियोगिता सूर्य नेपाल एनपीजीए म्याच प्लेको उपाधि जित्न सफल भएका छन् ।
रोयल नेपाल गल्फ क्लबमा सम्पन्न ३६ होलको फाइनलमा १३ औँ वरीयताका रमेश अधिकारीलाई ७÷६ ले हराउँदै दिनेश उपाधि जित्न सफल भएका हुन् । उपाधिसँगै दिनेशले ६० हजार प्राप्त गरे । दोस्रो भएका रमेशले ४२ हजार हात पारे ।
सूर्य नेपाल गल्फ टुरमा पहिलो उपाधि जित्ने क्रममा दिनेशले पहिलो नौ होलको खेलमा चार होलको अग्रता बनाए । १८ होलको समाप्तीमा दिनेश आठ होलको फराकिलो अग्रता बनाउन सफल रहे । खेलमा फर्कने संकेत देखाएका रमेशले १९ औँ, २० औँ, २१ औँ र २२ औँ होल लगातार जित्दै दिनेशको अग्रतालाइ चार होलमा घटाए ।
दिनेशले २३ औँ होल जित्दा रमेशले २४ औँ र २५ औँ होल आफ्नो पक्षमा पार्दै दिनेशको अग्रतालाइ तीन होलमा झारे । तर, २६ औँ र २७ औँ होल आफ्नो पक्षमा पार्दै दिनेशले पाँच होलको अग्रता बनाए । यसपछि दिनेशले २९ औँ र ३० औँ होल जित्दै ६ होल बाँकी रहँदा सहज जितका साथ उपाधि आफ्नो नाममा लेखाए ।
प्रतियोगितामा आठौँ वरीयताका धनबहादुर थापा तेस्रो भए । १८ होलको प्रतिस्पर्धा बराबरीमा टुंगिएपछि धनले प्ले–अफको पहिलो होलमा दशौँ वरीयताका भुवन कुमार रोक्कालाई पराजित गरे । तेस्रो भएका धनले ३२ हजार र भुवनले २४ हजार प्राप्त गरे ।
क्वाटरफाइनलमा पराजित चार खेलाडीहरू, नेपाल नम्बर एक प्रो शुक्रबहादुर राई, दोस्रो वरीयताका भुवन नगरकोटी, तेस्रो वरीयताका जयराम श्रेष्ठ र पाँचौँ वरीयताका रवि खड्काले समान ११ हजार प्राप्त गरे ।
यसैगरी पहिलो चरणबाट बाहिरिएका टंकबहादुर कार्की, सञ्जोक मोक्तान, कृष्णमान राजबाहक, प्रदीपकुमार लामा, सञ्जय लामा, सूर्यप्रसाद शर्मा, बलभद्र राई र रामे मगरले समान ६ हजार प्राप्त गरे ।
गत सिजनको उत्कृष्ट १६ प्रोफेसनल गल्फरले प्रतियोगितामा भाग लिने भए पनि चार खेलाडी देशबाहिर रहेकोले उत्कृष्ट २० सम्मका खेलाडीले भाग लिएका थिए । सूर्य नेपाल प्रालिको प्रायोजनमा पीजीए नेपालले आयोजना गरेको प्रतियोगिताको कूल पुरस्कार दुई लाख ५० हजार रहेको थियो ।
विजयी खेलाडीहरुलाई सूर्य नेपाल प्रालिका मार्केटिङ म्यानेजर केशव प्रधान र ब्रान्ड म्यानेजर विदुर राज अधिकारीले पुरस्कार वितरण गरे । सूर्य नेपाल गल्फ टुरअन्तर्गत २०२२–२३ सिजनको चौथो प्रतियोगिता सूर्य नेपाल वेस्टर्न ओपन पोखरास्थित हिमालयन गल्फ कोर्षमा फाल्गुन १० गतेदेखि आयोजना हुनेछ ।
