काठमाडौं । झापाको कचनकवल गाउँपालिका–४, केचनास्थित चिया बगानमा रहेको सिरिसको रुखमा झुन्डिएर आत्महत्या गरेका युवक–युवतीले भागी विवाह गरी तीन महिना केटाको घरमा बसेको खुलेको छ ।

करिब एक वर्षको प्रेम सम्बन्धपछि भागेका उनीहरूको भागी विवाह परिवारले अस्वीकार गर्दा आत्महत्या गरेको हुन सक्ने प्रहरीको प्रारम्भिक अनुसन्धानबाट खुलेको छ ।

जिल्ला प्रहरी कार्यालय झापाका प्रवक्ता एवं डीएसपी वसन्त पाठकले प्रेम सम्बन्ध असफल भएपछि आत्महत्या गरेको हुन सक्ने प्रहरीको प्रारम्भिक अनुसन्धानमा खुलेको बताए ।

एभरेस्ट चिया बगानको रुखमा पासो लगाएर झुन्डिएको अवस्थामा प्रहरीले मंगलबार बिहान २५ वर्षीय राजेशकुमार गणेश र १८ वर्षीया पवित्रा राजवंशीको शव फेला पारेको थियो । “प्रेम सम्बन्ध असफल भएपछि यस्तो भएको भन्ने बुझिन आएको छ । दुवैजनाले भागी विवाह गरेको र पछि छुटेको भन्ने छ,” डीएसपी पाठकले बाह्रखरीसित भने ।

मृतक युवकका मामा रघुनन्दन गणेशका अनुसार डेढ वर्षअघि उनीहरूले भागी विवाह गरेका थिए । “डेढ वर्षअघिदेखि नै उनीहरूको प्रेम सम्बन्ध थियो । त्यसपछि उनीहरूको भागी विवाह भएको हो । तीन महिना केटाको घरमा मिलेर बसेका थिए,” उनले भने ।

उनका अनुसार सोही समयमा पवित्राका बुवाले आफ्नी छोरीलाई ललाइफकाइ लगेको भन्दै मुद्दा हालेका थिए । गणेश भन्छन्, “त्यस बेला केटीका बुवाले ललाइफकाइ लगेको भन्दै मुद्दा हाले । अनि, जिल्ला अदालत झापाले दुवै पक्षलाई बोलाएर जेल हाल्यो ।”

केटा (राजेशकुमार) जेल परेपछि पवित्रालाई माइती पक्षले लिएर गएका थिए । केही महिना जेल बसेपछि राजेशकुमार छुटेको गणेशले बताए । “केटा छुट्दा केटी माइतीघरमै बसेकी थिइन् । दुवैजनाबीच अझै पनि कुराकानी भइरहेको छ भन्ने सुनिन्थ्यो । यस्तो घटना होला भन्ने कसैलाई थाहा थिएन । तर, आज एक्कासि यस्तो भयो । यसअघिका पारिवारिक घटनाक्रमहरूकै कारण दुवैजनाले आत्महत्या गरेको हुनसक्छ,” गणेशले बाह्रखरीसित भने ।

कचनकवल–४ का वडाध्यक्ष नरजजमा मियाँले पवित्राको उमेर नपुगेकाले उनका बुवाले मुद्दा हालेको बताए । उनका अनुसार त्यो घटना ०७८ साउनको हो । 

“पहिले भागेर गए । तीन महिना केटाको घरमा मिलेर बसे । पछि मुद्दा परेर उनीहरू छुट्टिए । अहिले यस्तो भयो,” वडाध्यक्ष मियाँले भने ।

डीएसपी पाठकका अनुसार उनीहरूको शव पोस्टमार्टमका लागि प्रादेशिक अस्पताल भद्रपुर पठाइएको छ । झुन्डिएको अवस्थामा युवतीले सिउँदोमा सिन्दूर लगाएकी थिइन् । “उहाँहरूले बिहे गरेको भन्ने होला । झुन्डिएकै अवस्थामा केटीको सिउँदोमा सिन्दूर थियो,” डीएसपी पाठकले भने ।