काठमाडौं महानगरपालिकाले टुँडिखेलको खुलामञ्च खण्ड मासेर भूमिगत पार्किङ बनाउन गरेको विवादास्पद निर्णय कार्यान्वन भयो भने काठमाडौंका लागि आत्मघाती हुनेछ । जनस्तर र महानगरपालिकाकै सदस्यहरूबाट समेत व्यापक विरोध हुँदा पनि टुँडिखेल मास्ने निर्णय फिर्ता नलिने जिद्दी अनुचित देखिन्छ ।
 
काठमाडौंवासीका लागि टुँडिखेल खुला चौरकै रूपमा पनि महत्त्वपूर्ण र उपयोगी छ । त्यसमाथि टुँडिखेलसँग स्थानीय बासिन्दाको विभिन्न परम्परा जोडिएकाले यसप्रति छुट्टै अपनत्व पनि रहेको छ । अर्थात्, भौतिक र भावनात्मक दुवैरूपमा खुला टुँडिखेल काठमाडौंका बासिन्दाको आफ्नो सम्पदा हो ।
 
जनजीवनको अभिन्न अङ्गका रूपमा रहेको काठमाडौंको  टुँडिखेल अहिले नै  टुक्राटुक्रा पारिएको छ । त्यसलाई एकीकृत गरेर सग्लो टुँडिखेल बनाउने सपना देख्दैआएका काठमाडौंवासीका लागि आफ्नै जनप्रतिनिधिले समेत भूमिगत पार्किङका नाममा मास्ने षड्यन्त्र गरेको थाहापाउँदा असह्य चोट लागेको देखिन्छ ।
 
यसैले ‘अकुपाइ टुँडिखेल’लगायतका अभियान र सम्पदा संरक्षणमा लागेका अभियन्ताहरूले यो निर्णय सार्वजनिक भएकै घडीदेखि विरोध गरेका हुन् । काठमाडौंको भौतिक संरचना निर्माणको योजनामध्ये सायद सबैभन्दा धेरै विरोध यही टुँडिखेल मास्ने योजनाको भएको छ । 
 
यसैले महानगरपालिकाले पार्किङका लागि अरू नै विभिन्न विकल्प खोज्न ध्यान दिएर टुँडिखेल चिथोर्ने योजना बदर गर्नु बुद्धिमानी हुनेछ । काठमाडौंवासी विशेषगरी यहाँका पुराना बासिन्दाले सम्पदाका सम्बन्धमा अठोट गरेपछि कसैले त्यसलाई परास्त गरेको उदाहरण छैन । 
 
टुँडिखेलमा भूमिगत वा बहुतल्ले पार्किङ नहुँदा पनि काठमाडौंको जनजीवन रोकिँदैन । तर, टुँडिखेल मास्दा काठमाडौंको मौलिकतामै चोट पुग्छ । काठमाडौंको मौलिकता मासेर हुने विकास उन्नति नभएर आत्मघात हो । यसैले टुँडिखेलसँग खेलाँची नगरौँ ।