काठमाडौं । मध्य पुसको चिसो साँझमा सांगीतिक समूह नेपथ्यले भृकुटीमण्डप पुगेका संगीतप्रेमीलाई भरपूर मनोरञ्जन प्रदान गरेको छ । मानव सेवा आश्रमको सहयोगार्थ गरिएको कन्सर्टमा नेपथ्यले दर्शकलाई झुमाएको हो ।

शनिबार गायक अमृत गुरुङले आफ्नो ब्यान्डका लोकप्रिय गीत गाएर उपस्थित स्रोता–दर्शकलाई नचाए । गायक गुरुङले लगातार दुई घण्टा सांगीतिक प्रस्तुति दिएका थिए ।

कन्सर्टमा नेकपा (एमाले)का अध्यक्ष एवं पूर्वप्रधानमन्त्री केपी शर्मा ओली, नेपाली कांग्रेसका महामन्त्री गगन थापा, महजोडी अर्थात् मदनकृष्ण श्रेष्ठ र हरिवंश आचार्यलगायत विशिष्ट व्यक्ति पनि उपस्थित थिए ।

गएको मंसिर १६ गतेदेखि विराटनगरबाट सुरु गरिएको सांगीतिक कार्यक्रम वीरगन्ज, हेटौँडा, नारायणघाट, नेपालगन्ज, धनगढी, सुर्खेत, बुटवल, पोखरा हुँदै शनिबार काठमाडौंको कन्सर्ट अन्तिम हो ।

मानव सेवा आश्रमले घरपरिवारबाट अपहेलित बनेका असहाय तथा बेसहारा मानिसलाई आश्रममा आश्रय दिइरहेको छ । मानव सेवा आश्रमले १९ जिल्लाका २३ आश्रमबाट मानव सेवाको कार्य गरिरहेको छ । नेपथ्यसँग सहकार्य गरेको सांगीतिक कार्यक्रमबाट संकलित रकमले आश्रमका भवन निर्माण र असहायहरूको स्वास्थ्योपचारका लागि आपत्कालीन कोष बनाइने आश्रमले जनाएको छ ।

थप तस्बिर हेर्नोस्–