काठमाडौं । नेपाल एयरलाइन्सले बोइङ विमान ‘गण्डकी’ अब डेढ वर्ष चलाउने भएको छ । २०४४ सालमा खरिद गरिएको नाइनएन एसीबी कलसाइन भएको विमान अन्य दुइटा विमान नआएसम्म उडाउने निगमको तयारी छ । 

१९० यात्रु क्षमताको यो विमानले अहिले अन्तर्राष्ट्रिय गन्तव्यमा उडान भरिरहेको छ । नयाँ एयरबस आएपछि भने निगमले यसलाई लिलाम गर्ने जनाएको छ ।  निगमले मर्मत गर्दै यो विमान चलाइरहेको छ । मर्मतका लागि निगमले गत असार ८ मा बोइङ सिंगापुर पठाएको थियो ।  मर्मतपछि यही हप्ता विमान काठमाडौं अवतरण गरेको थियो । 

बोइङ मर्मतमा गएस“गै निगमले उडान भर्दै आएको आठ गन्तव्यमा प्रभावित भएको थियो । 

विमान मर्मतका लागि कति खर्च लाग्यो भनेर निगमले खुलाउन चाहेन । “खर्चको विवरण आइसकेको छैन । केही दिनपछि आउँछ होला,” निगमका महाप्रबन्धक सुगतरत्न कंसाकारले भने । निगमका विमान महँगो खर्चमा मर्मत हुने गरेको भन्दै ‘सेतो हात्ती’कोउपमा दिएर टिप्पणी हुने गरेको छ ।  

निगमले एक बोइङ र दुई एयरबसबाट अन्तर्राष्ट्रिय उडान भर्दै आएको छ । 

सन् १९८३ मा पहिलो उडान भर्ने यो सिरिजको विमान उत्पादन भएको चार वर्षपछि निगमले नेपाल ल्याएको थियो । बोइङ कम्पनीले यो सिरिजको विमान उत्पादन १३ वर्षअघि २००४ अक्टोबरदेखि नै बन्द गरिसकेको छ । 

३० वर्षभन्दा पुराना विमान राखेर अन्य वायुसेवा कम्पनीसँग प्रतिस्पर्धा गर्न नसकिने भन्दै निगम अहिले नयाँ विमान खरिदमा जुटेको छ ।“एक वर्षदेखि १८ महिना महिनाभित्र नयाँ एयरबस आएपछि हामी यो बोइङ लिलामको प्रक्रियामा लैजान्छौं,” महाप्रवन्धक कंसाकारले भने । 

यता, अहिले लिलामको प्रक्रियामा रहेको बोइङ७५७–२००–१४ विमान लिलाम गर्ने या नगर्ने निगम अन्योलमा परेको छ । विमान किन्नका लागि टेन्डर हाल्ने कम्पनीले कम मूल्यमा टेन्डर हालेपछि विमान लिलाम गर्ने कि नगर्ने भन्ने मनस्थितिमा पुगेको हो ।

तीन दशक अगाडि १ अर्ब ३० करोड रुपैयाँमा खरिद गरेको विमान १४ करोड रुपैयाँमाकिन्नका लागि एक अमेरिकन कम्पनीले प्रस्ताव गरेपछि निगम त्यपतमै उक्त विमान दिने या लिलाम नै नगर्ने भन्नेमा अन्योलमा पुगेको हो । यसबारे निर्णय लिन निगमले सञ्चालक समिति बैठक बोलाएको छ । 

यसअघि निगमले दुईवटा वाइडबडी विमान खरिदका लागि नागरिक लगानी कोष र कर्मचारी सञ्चयकोसँग १२–१२ अर्ब रुपैयाँ ऋण सम्झौता गरिसकेको छ । ९ प्रतिशत ब्याजदरमा उक्त ऋण सम्झौता भएको हो । 

निगमले गत वर्ष माघमा ३०० सिरिजको दुईवटा ‘वाइड वडी’ जहाज किन्न खरिद सम्झौता गरेको थियो । निगमले विमान कम्पनी एएआरसँग २०७३ चैत २५ गते दुईटा वाइडबडी किन्ने सम्झौता गरेको थियो । सम्झौता अनुसार दुइटा जहाजको मूल्य २१ अर्ब ५८ करोड ८८ लाख रुपैयाँ पर्नेछ । सम्झौता अनुसार पहिलो वाइडबडी विमान ०७५ असार १६ गतेभित्र र त्यसको एक महिनापछि अर्को विमान उपलब्ध गराउने छ । 

निगमले २८० सिट क्षमताको वाइडबडी ए३३०–२०० खरिद गर्न लागेको हो । विमानमा १६ वटा विजनेश क्लास र २६४ इकोनोमि क्लासका सिट छन् । नयाँ विमान खरिद गरेपछि निगमको नयाँ एयरबसले दमाम, सिओल, सिड्नी र टोकियोमा नियमित उडान गर्नेछ ।