सांसदहरूले शपथ लिएकै मितिबाट तलब भत्तालगायत सुविधा र सांसदको प्रतीक चिह्न पाउँछन् । अर्थात्, शपथ ग्रहणपछि नवगठित प्रतिनिधि सभाका सदस्यहरूको कार्यकाल विधिवत् आरम्भ भएको छ । 

अपेक्षाकृत मतदान कम भए पनि जनताले नयाँ संसद्बाट देशले अग्रगति पाउने अपेक्षा राखेका छन् । अगिल्लो संसद्ले जनअपेक्षा पूरा गर्न नसकेकाले नयाँ संसद्प्रति पनि सन्देह पनि कायमै छ ।

नयाँ संसद्ले प्रधानमन्त्री चुन्नेछ भने राष्ट्रपति, उपराष्ट्रपति, सभामुख र उपसभामुख पनि चयन गर्नेछ । यसैले सांसदहरूको भूमिका यसपटक निकै महत्त्वपूर्ण हुने निश्चित छ ।

जननिर्वाचित संविधान सभाले पारित गरेको नेपालको संविधान, २०७२ पछि निर्मित निर्वाचित संसद् लगभग असफल भयो । धन्न, सर्वोच्च अदालतको  निर्णयका कारण यसले दुई दुईपटक भंग गरिँदा पनि कार्यकालसम्म पूरा गर्नसक्यो ।

प्रमुख विपक्षी दलले लगभग विनाकारण लामो समयसम्म संसद् चल्नै दिएन । कतिपय महत्त्वपूर्ण विधेयकहरू अनावश्यकरूपमा समितिको छलफल लम्याएर पारित हुन दिइएन । अर्थात्, अगिल्लो संसद् सन्तोषजनक हुन सकेन ।

यद्यपि, दुई ठूला कम्युनिस्ट पार्टीको गठबन्धन अगिल्लो प्रतिनिधि सभामा प्रचण्ड बहुमत पाएको थियो । प्रमुख विपक्षी नेपाली कांग्रेस पनि अपेक्षाकृत शान्तमात्र  होइन लगभग शिथिल देखिन्थ्यो । तैपनि विगत ५ वर्षमा सरकार र संसद्ले जनहितमा उल्लेख्य केही गर्न सकेन ।

अगिल्लो संसद्मा सांसदहरूको भूमिका निकै कमजोर र अनुत्तरदायी रह्यो । विशेषगरी कोभिड(१९ को महामारीमा देखिएको सरकारको अकर्मण्यताको मात्र होइन भ्रष्टाचारका विरुद्धसमेत सांसदले प्रभावकारी आवाज उपाएनन् ।

ठूला दलका नेताले सांसदहरूलाई भूमिकाहीन बनाए । अधिकांश निर्णय संसद्बाहिरै भए । सांसदहरू औपचारिकता पूरा गर्ने रबरछाप बनाइए । अब यस्तो नहोस् भन्ने अपेक्षा गरे पनि तिनै नेता र दलहरू निर्णायक भूमिकामा भएकाले आशा गर्ने ठाउँ खासै देखिँदैन ।

यसपटक संसद्को संरचनामा केही परिवर्तन भएको छ । केही नयाँ राजनीतिक दल र युवा सांसद् प्रतिनिधि सभामा प्रवेश गरेका छन् । मतदाताले निकै उत्साहका साथ तिनलाई निर्वाचित गराएकाले अपेक्षा पनि धेरै राखेको देखिन्छ ।

जनअपेक्षा पूरा गर्न नसके नयाँ पुराना सबै दलका सांसद्ले सजाय दिनेछन् । कतिपयको त राजनीतिक जीवन राम्ररी सुरु नहुँदै समाप्त हुनसक्छ । यसैले नवनिर्वाचित सांसदहरू असफल सिद्ध नेताको आदेशमा नतमस्तक हुनुभन्दा अन्तरात्मको आवाज सुन्ने तत्परता देखाऊन् ।

जनताका पक्षमा दृढतापूर्वक उभिन र राजनीतिमा व्याप्त विकृति विसङ्गति अन्त्य गर्न नवनिर्वाचित सांसद्हरूलाई प्रेरणा मिलोस् । कार्यकाल सफल होस् । शुभकामना !