अधिकांश पार्टीमा अध्यक्ष नै नेता चुनिएको घोषणा भए पनि प्रतिनिधि सभाको सबैभन्दा ठूलो दल नेपाली कांग्रेसमा भने संसदीय दलको नेतामा निर्वाचन नै हुनेभएको छ । यसबाट देशको लोकतान्त्रिक आन्दोलनलाई थप सुदृढ बनाउन सहयोग पुग्ने देखिन्छ ।

नेपाली कांग्रेसका सभापति एवं प्रधानमन्त्री शेरबहादुर देउवा र महामन्त्री गगनकुमार थापाले कांग्रेस संसदीय दलको नेताका लागि उमेदवारी दर्ता गरेका छन् । बहालवाला प्रधानमन्त्री तथा पार्टी सभापति पनि भएकाले देउवा अपेक्षाकृत सुविधाजनक अवस्था भए पनि महामन्त्री थापाको उमेदवारीप्रति धेरैको ध्यान केन्द्रित भएको छ ।

पार्टीका सर्वेसर्वा सभापतिका पक्षमा बहुमत हुनु खासै आश्चर्य वा गौरवको विषय होइन । तर, नेपाली कांग्रेसका सबैजसो चर्चित युवा नेताहरू महामन्त्री थापाका पक्षमा उभिएका छन् । यसबाट नेपाली कांग्रेसको राजनीति वाञ्छित मार्गमा अग्रसर हुने सम्भावना प्रकट भएको छ ।

संसदीय दलको नेतामा प्रतिस्पर्धा गर्ने महामन्त्री थापाको निर्णयले कांग्रेसमा आन्तरिक लोकतन्त्रको अभ्यास कमजोर नरहेको पुष्टि भएको छ । सम्भवतः राजनीतिप्रति बढ्दो वितृष्णा कम गर्न पनि यसले उल्लेख्य योगदान गर्नेछ ।

सबै प्रमुख दलमा उनै अनुहार तीन दशकभन्दा बढी नेतृत्वमा देखेपछि परिवर्तनको चाहना राख्नेहरूले यस निर्वाचनमा नयाँ दलहरूलाई उल्लेख्य मत दिएको देखियो । पुराना पार्टीहरूले समयसँगै नेतृत्व परिवर्तन गर्न नसकेपछि विमुख भएका युवा मतदातामा पनि गगन थापाको उमेदवारीले सकारात्मक सन्देश दिनेछ ।

प्रतिनिधि सभामा कांग्रेसका सांसदहरूका सामु यथास्थिति र परिवर्तनमध्ये एउटा रोज्ने चुनौती उत्पन्न भएको छ । सांसदहरूले एक कार्यकालका लागि लोभ र लाभको पक्षमा मत नदिएर परिवर्तनका पक्षमा ऐतिहासिक निर्णय गर्ने अपेक्षा सामाजिक सञ्जालमा व्याप्त छ । अहिले सामाजिक सञ्जाल ‘पर्खालमा लेखिएको अक्षर’ कै अर्को रूप हो । 

महामन्त्री थापाको उमेदवारीबाटै उत्साहित जनमत उनले निर्वाचन जिते भने पक्कै पनि निकै आशान्वित हुनेछ । समाजमा भविष्यप्रति आशाको सञ्चार हुनसक्यो भने त्यसको दूरगामी सकारात्मक प्रभाव पर्छ । यसैले नेपाली कांग्रेसबाट प्रतिनिधि सभामा विजयी सदस्यहरूले देश र दलका पक्षमा विवेकको प्रयोग गर्ने अपेक्षा गर्नु अन्यथा मानिनेछैन ।