काठमाडौं । जित्नैपर्ने समूह चरणको अन्तिम खेलमा उरुग्वेले घानाविरुद्ध पहिलो हाफमा २–० को अग्रता बनाएको छ ।
एकै समयमा अर्कोतर्फ भइरहेको खेलमा पोर्चुगल र दक्षिण कोरिया पहिलो हाफमा १–१ को बराबरीमा रोकिएका छन् ।
अल जनौब रंगशालामा जारी खेलमा घानाविरुद्ध उरुग्वेले २–० को अग्रता बनाएको छ ।
खेलको जर्जियन डे आरस्केइटाले २६ औँ मिनेटमा गोल गर्दै उरुग्वेलाई अग्रता दिलाएका थिए । यस्तै, ३२ औँ मिनेटमा आरस्केइटाले नै गोल गर्दै उरुग्वेको अग्रता दोब्बर पारे ।
त्यसअघि २१ औँ मिनेटमा आन्द्रे एयुले पेनाल्टीमा गोल गर्न चुक्दा घानाले अग्रताको अवसर चुकाएको थियो ।
उरुग्वेका रक्षक सर्जिओ रोचेटले पेनाल्टी क्षेत्रभित्र मोहम्मद कुदुसलाई लडाएपछि घानाले पेनाल्टी पाएको थियो । जसलाई एयुले गोल गर्न सकेनन् ।
यता, कतारको एजुकेसन सिटी रंगशालामा जारी खेलको पाँचौ मिनेटमा रिकार्डो होर्टाले गरेको गोलबाट पोर्चुगलले अग्रता बनाएको थियो । तर, किम योङ गोनले २७ औँ मिनेटमा गोल गर्दै दक्षिण कोरियालाई बराबरीमा फर्काएका थिए ।
अन्तिम १६ मा प्रवेश गर्नका लागि आज घाना, उरुग्वे र दक्षिण कोरिया जितको दबाबमा छन् । यता, पोर्चुगल भने अन्तिम खेलअगावै प्रिक्वार्टरफाइनलमा स्थान पक्का गरिसकेको छ ।