काठमाडौं । चार वर्षअघि रुसमा साविक विजेता जर्मनीलाई २–० ले स्तब्ध बनाएपछि ‘जायन्ट किलर’को छवि बनाएको दक्षिण कोरियाले आज (बिहीबार) दुईपटकको विश्व विजेता उरुग्वेविरुद्ध खेल्दै छ । कतारको एजुकेसन सिटी रंगशालामा यो खेल नेपाली समयानुसार साँझ ६ः४५ बजे सुरु हुनेछ ।
विश्वकपमा ‘ग्रुप अफ डेथ’का रूपमा परिचित यो समूह ‘एच’ मा उरुग्वेलाई दक्षिण कोरिया डर छ । समूहमा चार महादेशका चार चर्चित राष्ट्रहरू रहेकाले शीर्ष दुईमा रहन दुवै टिमलाई आज जितको दबाब छ । यो समूहमा उरुग्वे र दक्षिण कोरियासँगै घाना र पोर्चुगल पनि छन् ।
दक्षिण कोरियाविरुद्ध मैदानमा उत्रँदा उरुग्वेको फरवार्ड लाइनमा एन्डिन्सन काभानी र लुइस स्वारेजस्ता विश्व फुटबलमा आफ्नो बेग्लै पहिचान बनाइसकेका स्टारसँगै युवा प्रतिभा डार्विन नुनेज रहनेछन् । विश्वकपका लागि घोषित उरुग्वेको २६ सदस्यीय टिममा युरोपमा व्यावसायिक फुटबल खेल्ने १२ खेलाडी समेटिएका थिए । स्वारेज, रक्षक जस लुइस रोड्रिगेज र गोलकिपर सर्जियो रोचेट मात्र उरुग्वेको घरेलु लिग खेल्ने खेलाडी हुन् ।
यसको तुलना दक्षिण कोरियासँग गर्ने हो भने १३ खेलाडी घरेलु लिगका क्लबबाट खेल्छन् । सन ह्युङ मिन दक्षिण कोरियाका अनुभवी र टिमलाई चाहिएको बेला उत्कृष्ट प्रदर्शन गर्न सक्ने महत्त्वपूर्ण खेलाडी हुन् ।
जारी विश्वकपमा दुई एसियाली राष्ट्र साउदी अरेबिया र जापानले विश्व फुटबलका ‘जायन्ट’ अर्जेन्टिना र जर्मनीलाई पराजित गरिसकेका छन् ।