जनकपुरधाम । मधेस प्रदेशको कृषि विश्वविद्यालयमा प्राध्यापकविना नै विद्यार्थी भर्ना गर्न थालिएको छ । राजविराजस्थित केअ माध्यामिक विद्यालय परिसमा सञ्चालन रहेको विश्वविद्यालयमा ०७८ मंसिर २१ मा उपकुलपति (भीसी)मा डा. वैद्यनाथ महतोलाई नियुक्त गरिएको छ । विश्वविद्यालयको गत वर्ष मंसिर २७ गते उद्घाटन गरिएको थियो ।

तर, अहिलेसम्म पठनपाठनका लागि प्राध्यापक नियुक्त गरिएको छैन । विश्वविद्यालयमा रेक्टर (शिक्षाध्यक्ष) को पद रिक्त छ । विश्वविद्यालयका लागि आवश्यक पर्ने कुनै कर्मचारी छैनन् । तर, विद्यार्थी भर्नाका लागि भने सूचना निकालिएको छ । सूचनमा कात्तिक २९ गतेदेखि मंसिर २८ गतेसम्म अनलाइन माध्यमबाट विद्यार्थी भर्ना लिइने उल्लेख छ । 

माघ पहिलो सातादेखि शैक्षिक सत्र सुरु गर्ने भनिएपनि चुनावको मुखमै विद्यार्थी भर्नाका लागि आह्वान गरेर मधेस सरकारले भ्रमपूर्ण प्रचारबाजी गर्न खोजेको आरोप लागेको छ । राजविराज नगरपालिका ५ बस्ने शोभित सिंहले विश्वविद्यालय स्थापना भएर अध्ययन अध्यापनको कामसमेत प्रारम्भ भइसकेको प्रचार गरी चुनावमा मतदाताहरूलाई प्रभावित पार्न खोजेको देखिएको बताए । 

"विश्वविद्यालयको आन्तरिक संरचनासमेत तयार भइनसकेको अवस्थामा सोझै विद्यार्थी भर्ना गर्नु हास्यास्पद हो," उनले भने, "विश्वविद्यालयको सुरुवात नै विवादास्पद र हास्यास्पद भएकाले निरन्तर सञ्चालन प्रक्रिया जटिल हुन सक्छ ।"

विश्वविद्यालयको सबै गतिविधिहरू पारदर्शी हुनुपर्नेमा सबै गोप्य हुँदा उनले शंका व्यक्त गरे । 

निवर्तमान प्राध्यापक परमेश्वर कापडी प्राविधिक कक्षा सञ्चालन गर्न भौतिक पूर्वाधारलगायतका व्यवस्थापन हुनु आवश्यक रहेको बताउँछन् । तर, विश्वविद्यालयका लागि कुनै जनशक्ति छैन । 

"विद्यालयको कक्षा कोठामा विश्वविद्यालयले सञ्चालन गर्ने कक्षा सम्भव छैन," उनले भने, "विद्यार्थी भर्ना भन्दा कक्षा कोठा, प्राध्यापक, प्रशासनिक र लेखा कर्मचारीहरूको व्यवस्थापन आवश्यक छ ।"

आवश्यक तयारी पूरा नगरी विद्यार्थी भर्नाको विज्ञापन गर्न नहुने उनले बताए ।

राष्ट्रिय योजना आयोगका सदस्यसमेत रहेका प्राध्यापक डा. सुरेन्द्र लाभले मुल नियमभित्र रहेर नियमावली बनाउन विश्वविद्यालयको प्राज्ञिक सभाले निर्णय गर्नुपर्ने बताए ।

"विश्वविद्यालयले सञ्चालन गर्ने संकायका लागि पनि प्राज्ञिक सभाले निर्णय गर्नुपर्छ," उनले भने, "हचुवाको भरमा सोझै विद्यार्थीको नामांकनका लागि आवेदन आह्वान गर्नु शिक्षामा खेलबाँड हो । मधेस कृषि विश्वविद्यालय स्थापना भए पनि त्यसको कार्यकारी सदस्यहरूको नियुक्ति भएको छैन ।"

प्राज्ञिक सभा गठन नभएसम्म विश्वविद्यालयको गतिविधि नै अगाडि बढन नसक्ने उनको भनाइ छ । प्रदेश सरकारले गठन गरेको विश्वविद्यालयको कुलपति मुख्यमन्त्री रहने व्यवस्था ऐनमा छ । शिक्षण संस्थाको मापदण्ड र रित नपुर्‍याएर दिने डिग्रीले विद्यार्थीको भविष्य अन्धकार हुन सक्ने उनको चिन्ता छ ।

मधेस सरकारले मधेस कृषि विश्वविद्यालय राजविराजमा र मधेस विश्वविद्यालय वीरगञ्जमा खडा गरेको छ । मधेस स्वास्थ्य विज्ञान प्रतिष्ठान जनकपुरधाममा स्थापना गरेको छ । तर, तीनै विश्वविद्यालयको भविष्य अनिश्चित बनेको छ ।