धनगढी । नेपाली कांग्रेसले कैलाली निर्वाचन क्षेत्र नम्बर ५ मा स्वतन्त्र उमेदवार पुष्करनाथ ओझाको पक्षमा लागेको भन्दै पार्टीका नेता कार्यकर्तालाई स्पष्टीकरण सोधेको छ । पार्टीका आधिकारिक उमेदवार डिल्लिराज पन्तका विरुद्धमा मत मागेको भन्दै पूर्वजिल्ला सचिव पूर्णबहादुर कुँवरसहितका नेतालाई २४ घण्टे स्पष्टीकरण सोधिएको कांग्रेसले जनाएको छ ।

उनीहरूले उल्टै कारबाही पत्र सामाजिक सञ्जालमा पोष्ट गर्दै अहिले म स्वतन्त्र उमेदवारको प्रचारप्रसारमा व्यस्त रहेकाले निर्वाचन पछि जवाफ दिने भन्दै प्रतिकृया दिएका छन् । 

नेपाली कांग्रेस कैलालीका प्रचारप्रसार विभाग प्रमुख तपेन्द्र भुसालले पूर्वसचिव कुँवर, महाधिवेशन प्रतिनिधि गौरी लामा र भीमबहादुर शाहलगायतका नेताहरुसँग स्पष्टीकरण मागिएको जानकारी दिए ।

उनका अनुसार पूर्वमहासमिति सदस्य आन्नदराज जोशी, छत्रराज जोशी र बब्लु चौधरी, क्षेत्रिय प्रतिनिधि दीर्घराज भट्ट र राजकुमार सिँहलगायत नेतालाई स्पष्टीकरण सोधिएको छ । भुसालका अनुसार वडा कमिटिदेखि नगर, क्षेत्र र जिल्लास्तरसम्मका दर्जनौँ नेता, कार्यकर्तालाई पार्टीका आधिकारिक उमेदवारविरुद्ध लागेको पाइएपछि स्पष्टीकरण मागिएको छ । उनीहरूलाई पार्टीका उमेदवारविरुद्ध लागेकाले अनुशासनको कारबाही किन नगर्ने ? भनेर प्रश्न गरेको छ । धनगढी उपमहानगरपालिका–१३ मा मात्र १४ जना स्थानीय नेतालाई स्पष्टीकरण सोधिएको छ ।

कतिपय नेतालाई शनिबार र केहीलाई आइतबार स्पष्टीकरण सोधिएको कांग्रेसले जनाएको छ । कैलाली क्षेत्र नम्बर ५ मा नेपाली कांग्रेसका अधिकांश नेता, कार्यकर्ता पार्टीबाट निष्काशनमा परेका र अहिले प्रतिनिधिसभामा स्वतन्त्र उमेदवारी दिएका पुष्करनाथ ओझाको पक्षमा खुलेरै लागेका छन् ।