विराटनगर । व्याजदरवृद्धिको विरोधमा पूर्वका उद्योगीले बैंकिङ कारोबार नगर्ने घोषणा गरेका छन् । देशभरका व्यवसायीहरू व्याजदर बढेपछि विरोधमा उत्रिरहेका बेला पूर्वका उद्योगीले भने बैंकिङ कारोबार नै नगर्ने घोषणा गरेका हुन् । 

नेपाल उद्योग वाणिज्य महासंघ प्रदेश १ को आयोजनामा उद्योग वाणिज्य संघ, वस्तुगत संघ र एसोसिएट सदस्यहरूको भएको अन्तरक्रिया कार्यक्रमबाट भएको निर्णयबमोजिन विभिन्न आन्दोलनका कार्यक्रम घोषणा गरिएको हो । 

नेपाल उद्योग वाणिज्य महासंघ प्रदेश नम्बर १ ले आज जारी गरेको विज्ञप्ति अनुसार कात्तिक २२ गते मंगलबार बिहान ११ बजे आफ्नो जिल्लास्थित जिल्ला प्रशासन कार्यालय तथा जिल्ला वा नगरस्थित बैंक तथा वित्तीय संस्थाहरूमा ज्ञापन पत्र दिने कार्यक्रम तय गरिएको छ । 

यसैगरी २३ गते बुधबारका दिन बैंकसँग कुनैपनि कारोबार नगर्ने तथा दुई घण्टा प्ले कार्डसहित मौन जुलुस गर्ने, कात्तिक २५ गते बिहान शुक्रबार १० बजे नेपाल उद्योग वाणिज्य महासंघ प्रदेश नम्बर १ को सचिवालयमा भेला भई प्रदेश नं. १ का माननीय मुख्यमन्त्री एवं नेपाल राष्ट्र बैंकमा प्ले कार्डसहित धर्ना दिने तथा ज्ञापन पत्र दिने कार्यक्रम छ । 

कात्तिक २८ गते सोमबार नेपाल राष्ट्र बैंकको अव्यवहारिक नीतिविरुद्ध नेपाल उद्योग वाणिज्य महासंघको केन्द्रिय कार्यालयमा दबाब दिन भेला हुने र जिल्ला नगर उद्योग वाणिज्य संघ तथा वस्तुगत संघका अध्यक्षलगायत सम्पूर्णकार्यसमितिका पदाधिकारी एंव  सदस्य भेला हुने जनाइएको छ ।