काठमाडौं । महाकवि लक्ष्मीप्रसाद देवकोटाको ११४औँ जन्मजयन्तीका अवसरमा उनको व्यक्तित्वचर्चा कार्यक्रम आयोजना गरिएको छ । शनिबार मैतीदेवीस्थित महाकवि देवकोटा संग्रहालययमा नेपाल प्रज्ञा–प्रतिष्ठानद्वारा विशेष कार्यक्रम गरिएको हो ।

कार्र्यक्रममा प्रज्ञा–प्रतिष्ठानका निवर्तमान कुलपति गंगाप्रसाद उप्रेतीले महाकवि देवकोटा संग्रहालय सरकारका तर्फबाट निर्मित साहित्यकारहरूको पहिलो संग्रहालय भएको उल्लेख गरे ।

पूर्वकुलपति बैरागी काइँलाले नेपाली वाङ्मयको क्षेत्रमा महाकवि देवकोटाको विशिष्ट योगदान रहेको बताए । संग्रहालयको निर्माणले देवकोटाको योगदानलाई अमर तुल्याएको उनले उल्लेख गरे ।

प्रतिष्ठानका निमित्त कुलपति डा. जगमान गुरुङले पहिलोपटक महाकवि देवकोटा संग्रहालयमा उनको जन्मजयन्ती कार्यक्रम मनाउन पाउँदा गौरव अनुभव भएको बताए ।

कार्यक्रममा प्रा. जगत्प्रसाद उपाध्याय, प्रा. डा. हेमनाथ पौडेल, प्रा. डा. उषा ठाकुर, डा. देवी नेपाल, दलबहादुर कार्की, महाकवि देवकोटाकी सुपुत्री अम्बिकादेवी देवकोटा रिमाल, गोविन्द गिरी प्रेरणा व्यक्तिलगायतले बोलेका थिए ।