काठमाडौं । सर्वोच्च अदालतले नेकपा (एमाले)लाई जग्गा दान दिने भाटभटेनी डिपार्टमेन्ट स्टोरका सञ्चालक मीनबहादुर गुरुङको निर्णयविरुद्धको रिट खारेज गरिदिएको छ ।

सोमबार न्यायाधीशहरू अब्दुल अजीज मुसलमान र बालकृष्ण ढकालको संयुक्त इजलासले जग्गा दानविरुद्ध दायर भएको रिट निवेदनलाई खारेज गरिदिएको हो । रिट निवेदक अधिवक्ता ज्ञानबहादुर बस्नेतले रिट खारेज भएको पुष्टि गरे ।

जग्गा दान र भवन निर्माण रोक्न माग गरिएको अधिवक्ता बस्नेतको रिटलाई सर्वोच्च प्रशासनले १ कात्तिकमा दरपिठ गरिदिएको थियो । तर, दरपिठविरुद्ध परेको निवेदनमा न्यायाधीश तिलप्रसाद श्रेष्ठले कात्तिक ६ गते सर्वोच्च प्रशासनको निर्णयलाई बदर गरिदिएको थियो ।

गत २५ असोजमा भाटभटेनी सुपरमार्केटका अध्यक्ष गुरुङ र उनकी श्रीमती सावित्री गुरुङले एमालेको पार्टी कार्यालय निर्माणका लागि १० रोपनी १४ आना जग्गा प्रदान गरेका थिए । गुरुङले नै भवन निर्माण गरेर एमालेलाई हस्तान्तरण गर्ने गरी शिलान्यास नै गरिएको थियो । गुरुङले कीर्तिपुर नगरपालिका–२, मैत्रीनगरको जग्गा दान दिएका हुन् ।

यसैबीच समाजसेवी तथा व्यवसायी गुरूङले अदालतको निर्णयको स्वागत गर्दै आफूले निस्वार्थ तरिकाले दान गरेको बताउँदै समयमै निर्माण सम्पन्न गरेर पार्टीलाई हस्तान्तरण गर्ने बताए ।
“अदालतको निर्णय स्वागतयोग्य छ,” बाह्रखरीसँग कुरा गर्दै उनले भने, “हामीले भूमि पूजा गरेको एक वर्षमा निर्माण सम्पन्न गरेर हस्तान्तरण गर्ने योजना बनाएका थियौँ । तर केही ढिला हुन पुग्यो । अब पनि तोकिएको समयभन्दा ३–४ महिना ढिला गरी सम्पन्न गर्नेगरी अघि बढ्छौँ ।”