बेइजिङ । चीनको राजधानी बेइजिङमा हालै राष्ट्रपति सी जिनपिङको समेत आलोचना गरी भएको नाटकीय विरोध प्रदर्शन गर्ने रहस्यमय व्यक्तिको अहिले अनलाइनमार्फत व्यापक खोजी भइरहेको छ । उनकाे कार्यको प्रशंसा पनि भइरहेकाे बीबीसीले जनाएकाे छ ।
ती अज्ञात प्रदर्शनकारीले बेइजिङको हाइदियान जिल्लाको सितोंग पुलमा सी र कोभिड–१९ सम्बन्धी कडा सुरक्षा नियमहरूविरुद्ध नारा लेखिएका दुई वटा ब्यानर टाँगेका थिए । ती ब्यानरमा उनले चीनको शून्य–कोभिड नीतिको विरोध गर्नुका साथै सीलाई अपदस्थ गर्न आह्वान गरेका थिए ।
बिहीबारकाे यस घटनासम्बन्धी तस्बिर र भिडियो फुटेज अनलाइनमा भाइरल भइरहेको अवस्थामा पनि सरकारी सञ्चार माध्यम मौन छन् । तर, अधिकांश चिनियाँले प्रयोग गर्ने विच्याट र अन्य सामाजिक सञ्जालमा ती सामग्रीमाथि तत्काल सेन्सर गरिएका छन् ।
चिनियाँ सत्तारूढ कम्युनिस्ट पार्टीको ऐतिहासिक तथा महत्वपूर्ण बैठक हुन लागेको बेला यो घटना भएकाे हो । उक्त बैठकले सीलाई पार्टीको अध्यक्षको रूपमा तेश्रो कार्यकाल प्रदान गरी उनलाई अझै शक्तिशाली बनाउने अपेक्षा गरिएको छ ।
ती प्रदर्शनकारीले कारका टायर जस्ता वस्तु बालेको पनि देखिन्छ भने चिच्याएर नाराबाजी गरेको पनि सुनिन्छ । यस घटनालाई लिएर एक व्यक्ति पक्राउ परेको खबर पनि बाहिरिएको छ ।
प्रहरी अधिकारीहरूले घेरिएका पहेँलो टोपी र सुन्तला रंगको लुगा लगाएका एकजना मानिसको तस्बिर पनि सार्वजनिक गरेका छन् । चिनियाँ जनताले यी नयाँ अज्ञात प्रदर्शनकारीलाई ‘न्यू ट्यांक म्यान’ को संज्ञा दिँदै प्रशंसा गर्न थालेका छन् ।
सन् १९८९ को तियानमेन चोकमा प्रजातन्त्रको माग गर्दै भएको विरोध प्रदर्शनको क्रममा सैनिक ट्यांक मा चढेका एक अज्ञात युवकको पनि निकै प्रशंसा र चर्चा भएको थियो । चीन सरकारले सो प्रदर्शन दमन गरेको थियो ।
बीबीसीबाट ।