काठमाडौं । मोरङ, बारा र महोत्तरीमा भएका सवारी दुर्घटनामा तीनजनाको मृत्यु भएको छ । 

मोरङको सुन्दरहरैचा नरपालिका ८ मा हिजो बेलुकी कार र मोटरसाइककल आपसमा कोक्किँदा मोटरसाइकलमा सवार एकजनाको मृत्यु भएको हो । एकजना घाइते भएका छन् । 

मृत्यु हुनेमा मोटरसाइकलमा पछाडि सवार स्थानीय ४५ वर्षीय किरण बराइली रहेको प्रहरीले जनाएको छ । गम्भीर घाइते भएका उनको उपचारको क्रममा नोबेल अस्पताल विराटनरमा मृत्यु भएको हो । 

मोटरसाइकल चालकको सोही अस्पतालमा उपचार भइरहेको छ ।

बाराको महागढीमाई नगरपालिका ७ बरियारपुर चोकमा हिजो बेलुका मोटरसाइकल पल्टिँदा एक महिलाको मृत्यु भएको छ । मृत्यु हुनेमा मोटरसाइकलमा पछाडि सवार स्थानीय ४४ वर्षीया रामदुलारी साह रहेकी छन् । गम्भीर घाइते भएकी उनको उपचारका क्रममा न्युरो अस्पताल परवानीपुर नौतनमा मृत्यु भएको प्रहरीले जनाएको छ । 

मौलापुरबाट तेलकुवातर्फ आउँदै गरेको अल्फाबेट नखुलेको ८५ ०७ नम्बरको मोटरसाइकल हिजो बेलुका ८ बजे अनियन्त्रित भइ पल्टिएको हो । 

महोत्तरीको गौशाला नगरपालिका १ मिलनचोकमा हिजो बेलुकी मोटरसाइकलको ठक्करबाट पैदलयात्रीको मृत्यु भएको छ । मृत्यु हुनेमा स्थानीय ६५ वर्षीय चेतप्रसाद प्याकुरेल रहेका छन् । गम्भीर घाइते भएका उनको उपचारका क्रममा जानकी मेडिकल अस्पताल रमदैया धनुषामा मृत्यु भएको प्रहरीले जनाएको छ ।