काठमाडौं । धादिङ गजुरी गाउँपालिका–४ की १७ वर्षीया किशोरी सरिता नैकापको विष्णुदेवी शिक्षा सदन माविमा कक्षा १० मा पढ्दै थिइन् । 

तर, मंसिर अन्तिम सातादेखि भने उनी एक्कासी कक्षामा हाजिर हुन छाडिन् । स्कुललाई लागेको थियो, उनी घरायसी समस्याले स्कुल आउन नसकेकी होलिन् । उता सरिताका परिवारलाई स्कुल गइरहेकी होलिन् भन्ने लागेको थियो । 

सतुङगल–४ खरिबोटस्थित कोठा भाडामा बस्दै आएका सरिताका दाइ एक हप्ताअघि मात्रै वैदेशिक रोजगारीका लागि विदेश उडेका थिए । दिदी आफन्तको घर बस्न गएका कारण सरिता कोठामा एक्लै थिइन् । 

सरिताकी दिदी मंसिर ३० गते कोठामा पुग्दा बाहिरबाट चाबी लागेको थियो । सरिताको मोबाइलमा फोन गरिन्, मोबाइल अफ थियो । सरिताकी दिदीलाई लाग्यो, कामले बाहिर गएकी होलिन् । कोठा फर्किन्छन् नै ।

तर, सरिता अबेर हुँदा समेत कोठमा फर्किइनन् । मोबाइल बन्द थियो । सरिताको दिदीको मनमा चिसो पस्यो । सोधीखोजी गर्न लागिन् । कसैले सरिताबारे पत्तो दिएनन् । भोलिपल्ट स्कुल पुगिन् । स्कुलमा हाजिर नभएको खुलेपछि उनी प्रहरी गुहार्न पुगिन् । उनीसँगै सरिताका दाइ नाता पर्ने नवीन रूम्बाले सोमबार प्रहरी वृत्त थानकोटमा सरिता हराएकोबारे निवेदन दिएका थिए । प्रहरीले उनको खोजी थाल्यो ।

प्रहरीले बुधबार दिउँसो कोठाको चाबी फोडेर कोठाभित्र हेर्न खोज्यो । कोठा दुर्गन्धित थियो । प्रहरीले सरिताको शव कोठाभित्रै रहेको अनुमान लगायो । खोजतलास गर्दा सरिताको शव कोठाभित्र खाटमुनि फेला परेको प्रहरीले जनाएको छ । प्रहरीले हत्याको आंशका गर्दै अनुसन्धान तीव्र पार्‍यो ।

बाहिरबाट चाबी लगाएको अवस्थामा खाटमुनि शव फेला पर्नुले हत्या हो भन्नेमा प्रहरीलाई शंका थिएन । उनको मोबाइल पनि हत्या गर्नेले लगेको अनुमान प्रहरीले लगायो । उनको मोबाइलमा पछिल्लो समय भएका फोन नम्बरबारे विश्लेषण गर्‍यो ।

२४ घण्टाभित्र आरोपी पक्राउ

घटनाको अनुसन्धान गरेको जिल्ला प्रहरी परिसर काठमाडौंको टोलीले प्राविधिक विश्लेषणका आधारमा आरोपीलाई पक्राउ गर्न सफल भएको हो । प्रहरी परिसरको विशेष टोलीले बधुबार राति साढे नौ बजे धादिङ गजुरी गाउँपालिका–३ का २४ वर्षीय विश्वास तामाङलाई पक्राउ गर्न सफल भएको हो ।

उनलाई काठमाडौं महानगरपालिका–१४ स्वीचाटार खड्का गाउँबाट पक्राउ गरिएको परिसरका एसपी नवराज अधिकारीले जानकारी दिए । 

मृतक किशोरी सरिता र आरोपी विश्वास समेत चिनजानकै हुन् । उनीहरू आफन्त समेत भएको प्रहरीले जनाएको छ । अनुसन्धानमा खटिएका प्रहरी अधिकारीका अनुसार, विश्वासले बलात्कारपछि सरिताको हत्या गरेको खुलेको छ ।

अनुसन्धानमा खटिएका प्रहरी अधिकारीले भने, ‘‘सरिता र विश्वास चिनजानकै हुन् । विश्वास यसअघिसमेत सरिताको कोठामा आउने जाने गर्दा रहेछन् । मंसिर २८ गते पनि त्यसैको निरन्तरता देखिन्छ । त्यो राति शारीरिक सम्पर्कपछि हत्या गरेको देखिएको प्रारम्भिक अनुसन्धानमा खुलेको छ ।’’

आरोपी विश्वासले शारीरिक सम्पर्कपछि विवाद हुँदा हत्या गरेको प्रहरीको बयानमा स्वीकार समेत गरेको ती प्रहरी अधिकारीले बताए ।  परिसरका एसपी अधिकारीले भने मृतकको पोस्टमार्टम रिपोर्ट आउन बाँकी भएकाले बलात्कारबारे पुष्टि हुन बाँकी रहेको जानकारी दिए । 

प्रहरीले आरोपी विश्वासको कोठाबाट मृतकको मोबाइलसमेत बरामद गरेको छ । पक्राउ परेका आरोपी विश्वास विवाहित पुरुष हुन् । सामान्य ज्याला मजदुरी गर्ने उनकी श्रीमती पाँच महिना अघिमात्रै वैदेशिक रोजगारीका लागि कुवेत गएको खुलेको छ । उनीमाथि थानकोट प्रहरीले थप अनुसन्धान सुरू गरेको छ ।